पुस ८
नेपाल प्रहरीले गैरकानुनी गतिविधिमा संलग्न भएको आशंकामा १०० जनाभन्दा बढी चिनियाँ नागरिकलाई नियन्त्रणमा लिएको छ ।
पर्यटक भिसामा नेपाल आएर नेपालमा विभिन्न अवैध गतिविधि गर्दै बसेका चिनियाँहरुलाई सोमबार प्रहरीले नियन्त्रणमा लिएको हो ।
नेपाल प्रहरीको केन्द्रीय अनुसन्धान ब्यूरो (सीआइबी)को नेतृत्वमा महानगरीय अपराध महाशाखा र महानगरीय प्रहरी परिसर काठमाडौंले सोमबार बिहानैदेखि काठमाडौंका बूढानीलकन्ठ, मनमैजु, सामाखुसी, लाजिम्पाट, बाँसबारीलगायत ठाउँमा छापा पारी १०० भन्दा बढी चिनियाँलाई पक्राउ गरेको हो ।
अपार्टमेन्ट, निजी घर र होटलहरुमा छापा मारेर दिनभरमा करिब १५० जनाजति चिनियाँलाई नियन्त्रणमा लिइएको तर भिसा भएका र शंकास्पद नदेखिएका केहीलाई छाडिएको प्रहरीले जनाएको छ ।
प्रहरीले चिनियाँहरुविरुद्धको ‘अपरेसन’ अहिले पनि जारी राखेको छ ।
मनमैजुको एउटा घरबाट ११ जनालाई नियन्त्रणमा लिइएको छ । उनीहरुले एउटा ‘फ्ल्याट’कै एक लाख २० हजार रुपैयाँ भाडा तिरेको पाइएको प्रहरीले जनाएको छ ।
पर्यटक भिसामा आएका उनीहरु निजी घर भाडामा लिने तथा अपार्टमेन्टमा बसेर अवैध धन्दामा संलग्न हुने गरेको सूचनाको आधारमा उनीहरुलाई नियन्त्रणमा लिइएको प्रहरीले जनाएको छ ।
उनीहरु एउटै घरमा २५–३० जनाको समूहमा बस्ने गरेको पाइएको छ ।
उनीहरुले घरधनीलाई मागेकोभन्दा बढी भाडा दिएर घर लिने गरेको पाइएको पनि प्रहरीले जनाएको छ ।
नियन्त्रणमा लिइएका चिनियाँहरुबाट ठूलो संख्यामा ल्यापटप र मोबाइल बरामद गरिएको र उनीहरुका गतिविधिको अनुसन्धान भइरहेको पनि प्रहरीले जनाएको छ ।
पछिल्लो समय बैंक तथा वित्तीय संस्था ‘ह्याकिङ’मा चिनियाँहरुको संलग्नता बढ्दै गएको छ ।
