पुस ८
उपप्रधान एवं कानुनमन्त्रीबाट राजीनामा दिएका उपेन्द्र यादवले आफ्नो राजीनामापत्र प्रधानमन्त्री केपी शर्मा ओलीसमक्ष बुझाएका छन् ।
उनले मंगलबार दिउँसो प्रतिनिधिमार्फत् राजीनामापत्र प्रधानमन्त्रीलाई बुझाएका हुन् ।
यादवको राजीनामापत्र बोकेर उनका स्वकीयसचिव महेश चौरसिया प्रधानमन्त्रीको सरकारी निवास बालुवाटार गएका थिए ।
‘उहाँको प्रतिनिधि बनेर म बालुवाटार गएको थिएँ’–चौरसियाले इमेजखबरसित टेलिफोनमा भने–‘त्यहाँ मैले राजीनामापत्र दर्ता गराएर आएको हुँ । दर्ता नम्बर २८ हो ।’
उनकाअनुसार उनी मंगलबार दिउँसो ३ बजेतिर बालुवाटार गएका थिए ।
स्वकीयसचिव चौरसिया बालुवाटार गएपछि सिंहदरबारमा समाजवादी पार्टी नेपालको संसदीय दलको बैठक बसेको थियो ।
समाजवादी पार्टीका अध्यक्ष एवं संसदीय दलका नेता उपेन्द्र यादवले सो बैठकमा सरकारबाट बाहिरिने निर्णय गरेको जानकारी गराएका थिए ।
त्यसअघि नै इमेलमार्फत् यादवको राजीनामापत्र मिडियालाई पठाइएको थियो ।
मोहम्मद इस्तियाक राईको पनि राजीनामा
समाजवादी पार्टीबाटै सहरी विकासमन्त्री बनेका मोहम्मद इस्तियाक राईले पनि मंगलबारै राजीनामा दिएका छन् ।
मंगलबारै बिहान काठमाडौंमा उपलब्ध समाजवादी पार्टीका शीर्ष नेताहरुको बैठकले सरकारबाट बाहिरिने निर्णय गरेको थियो ।
