सम्झना श्रेष्ठ, सिन्धुली ।
नेपाल पत्रकार महासंघ सिन्धुली शाखाका अध्यक्ष होमकुमार कार्की (राजन) प्रहरीको कुटाईबाट गम्भिर घाईते हुनु भएको छ । जिल्ला प्रहरी कार्यालय सिन्धुलीमा कार्यरत दुई प्रहरीले सादा पोसाकमा आएर पत्रकार महासंघ सिन्धुलीका अध्यक्ष कार्कीलाई कुटपिट गरेका हुन् । प्रहरीको कुटाईबाट घाईते हुनु भएका कार्कीको सिन्धुलीमा उपचार हुन नसकेपछि थप उपचारकालागि काठमाण्डौ लगिएको छ । गए राती सिन्धुलीको शिवनगरको एक होटलमा खाजा खादै गर्दा जिल्ला प्रहरी कार्यालय सिन्धुलीमा कार्यरत काभ्रेका ३० बर्षिय प्रहरी हवल्दार सनम सिं लामा र २८ बर्षिय प्रहरी जवान विकास स्याङतानले विना कारण योजनाबद्ध तरिकाले कुटपिट गरेका हुन । अध्यक्ष कार्कीको टाउँकोमा गम्भिर चोट लागेको सिन्धुली अस्पतालले जनाएको छ । पत्रकार महासंघ सिन्धुली शाखा पुर्व अध्यक्ष मिनकुमार दहालसंग बसिरहेको बेला होटलमा गएका प्रहरी हवल्दार लामाले मोवाईलमा भिडियो कैद गरेको र अध्यक्ष कार्कीले भिडियो किन खिचेको डिलिट गर्नुस भन्दा दुई प्रहरीले मोटरसाईकलको हेल्मेट लगाएतका अन्य बस्तुले टाउकोमा हिर्काइ भागेको मिनकुमार दाहालले बताउनुभयो । प्रहरीको कुटाईबाट पुर्व अध्यक्ष दाहाल पनि घाईते हुनुभएको छ । यता जिल्ला प्रहरी कार्यालय सिन्धुलीमा राती नै पत्रकारहरुले कार्यालय घेराउ गरेपछि प्रहरी उपरीक्षक चक्रबहादुर सिंहले दुवै जना नियन्त्रणमा रहेको र आवश्यक अनुसन्धान गरेर दोषीभए कारवाही गर्ने बताउनु भएको छ । घाईतेको उपचार गर्ने ब्यबस्था मिलाउने प्रतिबद्धता समेत गर्नुभएको छ । नेपाल पत्रकार महासंघ सिन्धुलीले घटनाको विरोध गर्दै घाईतेको उपचार र दोषीलाई कानुनी कारवाही गर्न माग गरेको छ । पत्रकार महासंघ सिन्धुलीका अध्यक्षलाई प्रहरीले नै कुटपिट गरेको तर प्रहरी प्रमुख तथा प्रमुख जिल्ला अधिकारीबाट घटनाको बिषयमा सन्तोषजनक संबोधन नभएको भन्दै पत्रकारहरुले विरोध गरेका छन् ।
