असार ०४
रामेछाप । नेपालमा कोरोनाका कारण मृत्यु हुनेको संख्या २३ पुगेको छ । बुधबार एकैदिन २ जनाको कोरोनाका कराण र एक जनाको मृत्युपछि कोरोना पुष्टि भएको छ ।
बुधबार कैलालीमा कोरोनाका कारण एक जनाको मृत्यु भएको हो भने, सुर्खेत र अर्घाखाँची जिल्लामा एक-एक जनाको मृत्यु पछि कोरोना भाइरस संक्रमण पुष्टि भएको छ ।
कैलाली जिल्लाको गोदावारी नगरपालिका ४ का ४६ वर्षीय पुरुषको सेती प्रादेशिक अस्पतालमा उपचारको क्रममा कोरोना संक्रमणका कारण मृत्य भएको सेती प्रदेशिक अस्पतालका सूचना अधिकारी दिलीप श्रेष्ठले जानकारी दिए । उनलाइ गएको शनिबार कोरोना पुष्टि भएको थियो ।
उनलाइ नवजीवन अस्पतालको आइसोलेशन वार्डमा उपचार हुँदा कोरोना पुष्टि भएपछि सेती प्रादेशिक अस्पतालमा भर्ना गरिएको थियो । आइसियुमा राखेर उपचार भइरहेकामा हिजो (बुधबार) साँझ मृत्यु भएको अस्पतालका सूचना अधिकारी श्रेष्ठले जानकारी दिए ।
उता सुर्खेतमा मृत्यु भएका व्यक्तिमा कोरोना संक्रमण देखिएको छ । सुर्खेतमा झुन्डिएको अवस्थामा भेटिएकी युवतीको पीसीआर रिपोर्ट पोजिटिभ आएको हो । युवतीको मृत्युपछि गरिएको कोरोना परीक्षण रिपोर्ट पोजिटिभ आएको कर्णाली प्रदेश सामाजिक विकास मन्त्रालय अन्तर्गतको स्वास्थ्य महाशाखाका प्रमुख डा. लक्ष्मीनारायण तिवारीले जानकारी दिए ।
सुर्खेतको सिम्ता गाउँपालिका ८ घर भएकी २५ वर्षीया युवतीको शव असार १ गते झुन्डिएको अवस्थामा भेटिएको थियो । पोस्टमार्टम गर्नु अघि भएको पीसीआर परीक्षणमा बुधबार रिपोर्ट पोजिटिभ आएको डा. तिवारीको भनाइ छ ।
मृतक युवती जेठ १२ गते भारतबाट श्रीमान र तीन वर्षकी छोरीसहित नेपाल फर्किएकी हुन् ।
त्यस्तै अर्घाखाँचीमा आत्महत्या गरेका व्यक्तिमा कोरोना रिपोर्ट पोजेटिभ देखिएको छ । शीतगङ्गा नगरपालिकाका ४५ वर्षीय पुरुषमा कोरोना सङ्क्रमण पुष्टि भएको हो ।
उनी शीतगङ्गा –५ जुकेना गल्दाको हरि माध्यमिक विद्यालयको क्वारेन्टिनमा बसेका थिए । गत जेठ १० गते भारतबाट घर फर्किएका उनको आरडिटी रिपोर्ट पोजेटिभ आएपछि पिसिआर परीक्षणका लागि जेठ २४ गते स्वाब सङ्कलन भएको थियो । गए राति उनले आत्महत्या गरेको जिल्ला प्रहरी कार्यालय अर्घाखाँचीले जनाएको छ ।
अब नेपालमा कोरोनाका कारण मृत्यु हुनेको संख्या २३ पुगेको छ । हिजो एकै दिन ४ जनाको मृत्यु भएको हो । यी तीन जनाको मृत्युको आधिकारीक जानकारी स्वास्थ्य तथा जनसंख्या मन्त्रालयले पुष्टि गर्न भने बाँकी छ ।
यस अघि हिजो (बुधबार) हिजै दिउँसो स्वास्थ्य मन्त्रालयले नेपालगञ्जमा मृत्यु भएकी ४६ बर्षीय महिलाको कोरोनाका कारण मृत्यु भएको पुष्टी भएको थियो ।
हालसम्म कोरोना संक्रमणले सिन्धुपाल्चोक, बारा, ललितपुर, अर्घाखाँची, दैलेख, बाजुरा, दोलखा, पाल्पा, सुर्खेत, कैलाली, डोल्पा, स्याङ्जा, चितवन, अर्घाखाँची, विरगञ्ज र पर्सामा एक एक जनाको मृत्यु भएको छ ।
नेपालमा कोरोना संक्रमितको संख्या पनि हिजो आहिले सम्मकै उच्च संक्रमितहरु थपिएका थिए । हिजो एकैदिन ५ सय ८६ जनामा कोरोना संक्रमण पुष्टि भएको थियो । यो संगै कुल संक्रमितको संख्या ७ हजार १ सय ७७ जना पुगेको छ । कोरोना जित्नेको सख्या भने तुलनात्मक रुपमा निकै कम छ । हिजो सम्म नेपालका निको हुनेको संख्या कुल १ हजार १ सय ६८ जना पुगेको छ । file Photo
