असार १३, जनता भ्वाइस संवाददाता, रामेछाप
गोकुलगंगा गाउँपालिकाका अध्यक्ष खड्कबहादुर सुनुवारले आफ्नो गाउँपालिका सुरुआतकै समयदेखि बनाएको पाँच वर्षको रणनीतिमा चलिरहेको बताएका छन् ।
आफूहरुले बनाएको यस वर्षको बजेट कृषि, पूर्वाधार, पर्यटन, शिक्षा, स्वास्थ्य सबैलाई समेटेर बनाएको सुनुवारको भनाई छ । बिहिबार जनता भ्वाइससँग कुराकानी गर्दै सुनुवारले समग्रमा आफूहरुको बजेटले कृषि क्षेत्रलाई प्रमोट गर्ने उद्देश्य राखेको बताएका छन् । कोरोना भाइरस कोभिड १९ को कारणले आफूहरुले सोचेको र चालेका केही कामहरु गर्न नपाएको बताउँदै कोरोना भाइरसले समस्यामा पारेको भएपनि ९० प्रतिशत कार्यसम्पन्न भएको सुनुवारले जनाएका छन् । ‘आफ्नो गाउँपालिकामा भएको पहिलो सम्भावना चिया तथा अलैंची खेतीलाई अझ बढावा गर्न कस्तो रणनीति बनाउनु भएको छ ?’ भन्ने जनता भ्वाइसको प्रश्नमा सुनुवार भन्छन्, ‘चिया र अलैंची मात्रै होइन, हाम्रो गाउँपालिकाले कफि खेतीदेखि चौरी पालन गर्न सक्ने क्षेत्र छ ।
हामीले कृषिको अठार पकेट क्षेत्र बनाएका छौं । यो पकेट क्षेत्र नियमित संचालन हुँदैछ । पहिलाको भन्दा प्रगति निकै राम्रो भएको छ । आलु खेती पचासौं गुण बढेको छ । किवीखेती, बाख्रापालन, बंगुर, कुखुरा, लोकल कुखुरा, माछापालन लगायतका व्यवसायहरु निकै बढेको छ । कृषि सँगै अन्य कुराहरुको पनि विकास राम्रो भएको छ ।’
सुनुवारले आफ्नो गाउँपालिका क्षेत्रमा २ सय भन्दा बढी प्रकारका जडिबुटी रहेको बताएका छन् । यस वर्षको नीति तथा कार्यक्रमहरुमा आफ्नो गाउँपालिकामा रहेको जडिबुटी संकलन, प्रशोधन र त्यसबाट गरिने आयआर्जनको बारेमा कस्तो सम्बोधन भएको छ ?’ भन्ने सवालमा सुनुवार भन्छन्, ‘हाम्रो गाउँपालिकामा जडिबुटी खेतीको राम्रो प्रमोट गरेका छौं ।
लौठसल्लाको उत्पादनको प्रयास भइरहेको छ । जडिबुटीको प्रशोधनको प्रमोट पनि गरिरहेका छौं । जडिबुटी सम्बन्धी काम गर्न गाह्रो छ नै । यसको लागि प्रविधि र दक्ष जनशक्तिको अभावका चुनौति छन् । जडिबुटीलाई चिन्न अर्थात् रिसर्च गर्न गाह्रो छ । यसमा हामी निकै कमजोर छौं । यसमा दुईमत छैन । हाम्रो गाउँपालिकामा यार्सागुम्बा समेत हुने गर्दछ । हाम्रो गाउँपालिकामा पानीको श्रोत अत्याधिक रहेको छ । प्राकृतिक स्रोतको सदुपयोग गर्न सके यो गाउँपालिका धनी बन्न सक्छ । यस्तै कुरालाई सम्बोधन गर्दै हाम्रो गाउँपालिकाको नीति तथा कार्यक्रम अगाडि आएको छ ।
कोरोना भाइरस कोभिड १९ बाट गाउँ फर्किएका युवाहरुलाई गाउँमा नै रोक्न चालु आर्थिक वर्षको बजेट सम्पन्न भएसँगै नयाँ आर्थिक वर्षको बजेटले पहिलो प्राथमिकता रोजगारीलाई दिने जनाएको छ । रोजगारी खोज्दै आफूहरुले ५ करोड भन्दा बढी रकम सडक मर्मतमा छुट्याएर सो कामका लागि आफ्ना गाउँपालिका भित्रका युवाहरुलाई काममा लगाउने र सदुपयोग गर्ने सुनुवारको धारणा रहेको छ ।
