‘पूर्ण खोप सुरक्षित भविष्य’ भन्ने मूल नाराका साथ रामेछापको मन्थली नगरपालिका पूर्ण खोप सुनिश्चित पालिका घोषित भएको छ । १६ देखि ५९ महिनासम्मका सबै बालबालिकालाई १५ महिनाको उमेरभित्रै पाउनुपर्ने सम्पूर्ण खोप दिलाएर सरकारको निर्देशिका बमोजिमका प्रक्रिया पूरा गरेपछि मन्थलीलाई सो प्रमाणपत्र दिइएको हो ।
शनिबार आयोजित विशेष कार्यक्रममा जिल्ला समन्वय समितिका उपप्रमुख प्रेमबहादुर थापा र जिल्ला खोप समन्वय समितिका सदस्य सचिव एवं जनस्वास्थ्य कार्यालयका प्रमुख विभु कुमार झाले मन्थली नगरपालिकाका प्रमुख लब श्रेष्ठ र उपप्रमुख ईश्वरी बस्नेतलाई संयुक्त रूपमा प्रमाणपत्र हस्तान्तरण गरे ।
जिल्ला खोप समन्वय समितिका अध्यक्ष एवं जिल्ला समन्वय समिति प्रमुख चिना खड्का कार्की र सदस्य सचिव झाद्वारा हस्ताक्षरित प्रमाणपत्रमा पालिकाको अथक मिहिनेतको प्रशंसा गर्दै यसलाई निरन्तरता दिन आग्रह गरिएको छ । कार्यक्रममा उपप्रमुख थापाले मन्थली नगरपालिकालाई बधाई दिँदै पूर्ण खोपको अवस्थालाई दिगो राख्न सुझाए ।
मन्थलीको यो घोषणासँगै रामेछापका सबै स्थानीय तह पूर्ण खोप सुनिश्चित भएका छन् । अब केही समयमै जिल्लालाई नै औपचारिक रूपमा पूर्ण खोप सुनिश्चित घोषणा गर्ने तयारी भइरहेको जिल्ला समन्वय समितिले जनाएको छ ।
