सम्झना श्रेष्ठ, जेष्ठ १६, शुक्रबार सिन्धुलीमाढी ।
सिन्धुलीमा अहिलेसम्म १०२७ जनाको र्यापिड डायग्नोष्टिक आरडिटि टेस्ट गरिएको छ । ९ वटा स्थानिय तह रहेको सिन्धुलीमा आरडिटि परिक्षणमा ३२ जनामा पोजेटिभ रिपोर्ट आएको छ भने ९९५ जनाको रिपोर्ट नेगेटिभ आएको जिल्ल प्रशासन कार्यालय सिन्धुलीले जनाएको छ । आरडिटि परिक्षणमा ३२ जनामा रिपोर्ट पोजेटिभ आएकाहरुको पिसिआर रिपोर्ट भने नेगेटिभ आएको छ ।
यस्तै अहिलेसम्म जिल्लाबाट १०० जनाको पिसिआर परिक्षण गरिएको छ, जसमा ९७ जनाको रिपोर्ट नेगेटिभ आएको छ भने ३ जनाको रिपोर्ट आउन बाँकी छ । यसैगरि जिल्लाबाट कोरोनाको आशंका गरि पिसिआर विधिबाट कोरोना जाँच गर्दा सबैको रिपोर्ट नेगेटिभ आएको स्वास्थ्य कार्यालय सिन्धुलीका प्रमुख जितेन्द्र शाहले जानकारी दिनुभयो । जिल्लाबाट अहिलेसम्म पिसिआर विधिबाट कोरोना जाँच गर्दा कसैको पनि रिपोर्ट पोजेटिभ आएको छैन तर, सिन्धुली स्थाई ठेगाना भएकी एक महिलामा भने यसअघि कोरोना संक्रमण पुष्टि भएको थियो ।
जिल्लामा अहिले तयारी अवस्थामा ३२ बेडको आइशोलेसन तथा ४०६ बेडको क्वारेन्टाइन रहेका छन् । जिल्लामा अहिलेसम्म बिदेशबाट आउनेको संख्या ३७९ जना आएका छन् ति मध्ये गत बैशाखमा भारतबाट आउनेको संख्या १७२ रहेको जिल्ला प्रशासन कार्यालय सिन्धुलीका सुचना अधिकारी उपेन्द्र न्यौपानेले जानकारी दिनुभयो । उहाँका अनुसार भारतबाट आएका नागरिकहरु जिल्लाको विभिन्न स्थानिय तहहरुको क्वारेन्टाइनमा रहेका छन् । अहिले जिल्लामा जम्मा १८६ जना क्वारेन्टाइनमा छन् ।
