जेठ ४,
रामेछाप, लकडाउनको कारण कार्यस्थलबाट आफ्नो घरतर्फ लाग्ने मजदुरहरु मन्थलीमा अलपत्र परेका छन् । उमाकुण्ड गाउँपालिकामा निर्माणाधिन मध्यमार्गी सडक आयोजनामा काम गर्ने दाङ र रोल्पा जिल्लाका १० जना मजदुरहरु आइतबार बिहान मन्थली आइपुगेका छन् ।
‘२ रात ३ दिन अहोरात्र पैदलै हिँडेर यहाँ सम्म आइपुगियो । दाङ र रोल्पा हिँडेरै पुग्ने योजना छ ।’ मजदुर विशाल भण्डारीले जनता भ्वाइससँग भने ।
रातदिन हिँडेर थकान मुद्रामा मन्थली झरेका कुनै पनि मजदुरहरुको आँखामा चमक देखिँदैनथ्यो । उद्योग वाणिज्य संघ, रामेछापले उनीहरलाई खानपिनको लागि समन्वय गरेको रामेछाप उद्योग वाणिज्य संघका कार्यकारी अधिकृत नवीन केसीले जानकारी दिए ।
‘हामी १० जना छिटो हिँड्ने भएकोले आजै यहाँ सम्म आइपुग्यौं । अरु २५ जना साथीहरु आउँदै हुनुहुन्छ ।’ तुलाराम भण्डारीले भने ।
जिल्ला प्रशासन कार्यालय रामेछापले मन्थली आइपुगेका सडक निर्माणका मजदुरहरुलाई उनीहरुले काम गरेको निर्माण व्यवसायीसँग समन्वय गरी घर पठाउने व्यवस्था गर्न लागिएको प्रमुख जिल्ला अधिकारी रुद्रादेवी शर्माले जानकारी दिएकी छिन् । ‘हामीले रोल्पाका प्रमुख जिल्ला अधिकारीसँग समन्वय गरिरहेका छौं । आवश्यक समन्वय गर्ने काम भइरहेको छ । बाँकी मजदुरहरु समेत आइपुगेपछि हामी उनीहरुलाई आवश्यक व्यवस्था गर्छौं ।’ शर्माले भनिन् ।
उता, रोल्पाका प्रमुख जिल्ला अधिकारी लक्ष्मण ढकालले आफ्नो सीमा क्षेत्रमा प्रवेश गरिसकेपछि मात्रै आफूले केही गर्न सक्ने बताएका छन् । जनता भ्वाइससँग टोलिफोन संवादमा प्रमुख जिल्ला अधिकारी ढकालले भने, ‘त्यहाँबाट मैले रिसिभ गर्ने बारे केही गर्न सक्दिन । यहाँ हाम्रो सीमा क्षेत्रमा आए भने हामी रिसिभ गर्छौं ।’
आफूहरुले यहाँ (रोल्पा) बाट गाडी वा पास पठाएर ल्याउने विषय नरहेको र आवश्यक गाडीको कस्तो व्यवस्था गर्ने भन्ने रामेछाप प्रमुख जिल्ला अधिकारीको जिम्मेवारी भएको बताएका छन् ।
यसरी हेर्दा मन्थलीमा आइपुगेका १० जना र बाटोमा आउँदै गरेका २५ जना गरी कूल ३५ जना रोल्पाली र दङ्गाली नागरिक मजदुरहरुको अवस्था नाजुक देखिने भएको छ । नेपालमा कोरोना भाइरस (कोभिड १९) को संक्रमण तिव्र हुँदै गरेको आजको अवस्थामा पैदलै रोल्पा र दाङ सम्म पुग्नु निकै चुनौतिपूर्ण हुने देखिएको छ ।
यता रामेछाप जिल्ला प्रसाशन कार्यालले आफ्नो जिल्लाभित्र र जिल्ला बाहिर आवत जावतका लागि पैदलै प्रवेश या फिर्ती नदिने निर्णय केही दिन अघि नै गरिसकेको छ ।
