जेठ ४,
काठमाडौं । नेपाल कम्युनिस्ट पार्टीका राष्ट्रियसभा सदस्य नारायणकाजी श्रेष्ठले भारतले अतिक्रमण गरेको भूमि समेटेर नक्सा सार्वजनिक गर्ने निर्णय ऐतिहासिक भएको बताउनुभएको छ । आइतबार राष्ट्रियसभामा सरकारको नीति तथा कार्यक्रम माथिको छलफलका क्रममा उहाँले यस्तो बताउनुभएको हो ।
“नेपालको पश्चिमी सीमामा महाकाली नदीवारी जुन भूमी अतिक्रमित भएको थियो । त्यो फिर्ता ल्याउन ठोस पहल गर्ने र अहिलेसम्म नेपालको नक्सामा छुट हुन गएका ती भूभाग सामेल गरेर नेपालको नक्सा सार्वजनिक गर्ने ऐतिहासिक निर्णय यो सरकारले नीति तथा कार्यक्रममार्फत उद्घोष गरेको छ, धन्यवाद दिन चाहन्छु,” उहाँले भन्नुभयो ।
उहाँले नेपालले देशको सार्वभौमिताको पक्षमा उभिन कुनै अन्य शक्तिहरूको उक्साहट वा भूमिका आवश्यक छैन भन्ने बुझ्न पनि सचेत गर्नुभयो ।
केही दिन अघि भारतीय सेनापतिले लिपुलेकमा नेपालको भूमि अतिक्रमणबारे नेपालले अरूको उक्साहटमा प्रतिक्रिया दिपको थियो । जवाफमा श्रेष्ठले नेपाल कहिले कसैको उपनिवेश नबनेको भन्दै आफ्नो देशको हितमा बोल्न कसैको उक्साहट वा भूमिका आवश्यक नरहेको पनि जिकिर गर्नुभयो ।
