यो सफलता मेरो मात्रै होइन, यो मेरो विद्यालय र मेरो घरपरिवार सबैको समूहिक जीत हो । हुन त कक्षा ८ को यो नतिजा नै सर्वोपरी त होइन तर यसले भोलिका दिनमा देखाउने बाटो महत्वपूर्ण र त्यसका लागि आजदेखि गरिने मेहनत मुख्य हो भन्ने लाग्छ ।
आज मन्थली नगरपालिकाको विद्यालय तह परीक्षामा जिपिए ४ ल्याउन सफल भएँ । त्यसको श्रेय मेरा साथीहरुलाई पनि मैले दिनुपर्छ । हामी साथीहरु मिलेर गरेको ग्रुप स्टडी गर्नाको कारणले पनि आफ्नो पढाईमा राम्रो सफलता पाउन सकिन्छ ।
मैले मेरो दैनिकीलाई निकै व्यालेन्समा चल्ने बनाएको छु । जब म विद्यालयबाट फर्कन्छु तब मैले सिधै आफूलाई पढाईमा अग्रसर गराउँदिन । सर्वप्रथम, आफूलाई दिनभरीको विद्यालयको पढाईबाट मानसिक रुपमा आरम खोज्छु । जब म आफ्नो शरीरले चाहेको आरम पाउँछु, तब मैले गर्नुपर्ने गृहकार्य गर्न तर्फ लाग्छु ।
मैले पढ्दा कहिल्यैपनि बिना रुटिन पढिँन । के, कति, कसरी पढ्ने भन्ने बारे म निकै सचेत छु । आफ्नो दैनिकीलाई आफ्नै ‘स्टाइल’ मा चलाउनु पर्छ भन्ने मान्यता राख्छु ।
मेरो तहमा पढ्ने विद्यार्थीले पाठ्यपुस्तकको मात्रै अध्ययन गरेर पुग्दैन । पाठ्यपुस्तकको भन्दा पछि विभिन्न सन्दर्भ पुस्तकहरु पनि पढ्नु पर्छ । दैनिक रुपमा गरिने पढ्ने क्रियाकलाप भन्दा बाहेक आफ्नो मनले चाहेको जस्तो चित्र कोर्न, कविता लेख्न, गीत गाउन, घरको सानासाना कामहरु गर्न समेत पछि पर्नु हुँदैन । आफूले जानेका कुराहरु अरुलाई सिकाउँदा पनि आफ्नो मानसिक क्षमतामा विकास हुन्छ …
