जेठ ९,
रामेछाप । जिल्लाको खाँडादेवी गाउँपालिकाको वडा नं १ राकाथुमका १५ जना कोरोना आशंकितहरुको रिपोर्ट नेगेटिभ आएको छ । त्यहाँका एक २३ वर्षीय युवामा गत मंगलबार काठमाडौंमा गरिएको परिक्षणमा रिपोर्ट पोजेटिभ आएको थियो । उनी गत बैशाख ३१ गते त्यहाँबाट काठमाडौं गएका थिए । अहिले संक्रमित व्यक्तिको टेकु अस्पतालमै उपचार भैरहेको जिल्ला अस्पताल रामेछापका प्रमुख जितेन्द्र कुमार कर्णले जानकारी दिए ।
उनी त्यहाँ रहदा उनको सम्पर्कमा आएकाहरु १५ जनालाइ पनि कोरोना संक्रमण हुन सक्ने आशंकामा उनीहरुको स्वाब संकलन गरि काठमाडौं पठाएइकोमा बिहिबार साँझ सबैको रिपोर्ट नेगेटिभ आएको जिल्ला स्वास्थ्य कार्यालय रामेछापले जनाएको छ ।
जिल्लामा विहिबारसम्मका ३५ जनाको पिसिआर विधिबाट गरिएको कोरोना परिक्षणको सबै रिपोर्ट नेगेटिभ आएको हो ।
त्यस्तै जिल्लामा हालसम्म ४ सय ३९ जनाको र्यापिड टेष्ट गरिएकोमा सबैको रिपोर्ट नेगेटिभ आएको छ । विहिबारसम्म जिल्लाको विभिन्न पालिकामा तथा नगरपालिकाका ७३ जना महिला र ३ सय ६६ जना पुरुषको र्यापिड डायग्नोस्टिक टेष्ट (आरडीटी) प्रविधिबाट कोभिड -१९ को परीक्षण गर्दा सबैको रिपोर्ट नेगेटिभ आएको कर्णले जानकारी दिए ।
जिल्लामा आहिले ७३ जनालाई क्वारेन्टिनमा राखिएको उनको भनाइ छ । विहिबारसम्म विभिन्न पालिका तथा नगरपालिकामा गरि २१ जना महिला र ५३ जना पुरुषलाई क्वारेन्टिनमा राखिएको प्रमुख कर्णले जानकारी दिए । फाइल फोटो
