तपाईंले अहिलेसम्म कति अग्लो खुर्सानीको बोट देख्नु भएको छ ?
२ फिट ? ३ फिट ? या बढीमा ६ फिट ?
६ फिट त बिरलै देख्नुभएको होला ?
गिनिज बुक अफ् वल्र्ड रेकर्डमा जम्मा १४. ७ फिट अग्लो खुर्सानीको बोटको रेकर्ड कायम छ ।
भारतको नागाल्याण्ड दिमापुरबाट ८ किलोमिटर टाढा रहेको सोभिमा भन्ने गाउँका थेप्सु सातु ओ रियो नामका एकजना व्यक्तिले सन् २०११ मा यो रेकर्ड बनाए थिए । द टेलिग्राफ अनलाईन संस्करणले यो समाचार प्रकाशन गरेको थियो ।
रियोको खुर्सानीको बोटले १४.७ फिटको विश्व कृतिमान बनाएपछि उनका वरपरका जिल्लाबाट सो खुर्सानीलाई हेर्न दर्शकहरुको ठूलो भिड लागेको थियो ।
नेपालमा कृषि क्षेत्रको विश्वरेकर्ड कमै कायम भएका छन् । कृषि भन्दा बाहेक अन्य क्षेत्रको विश्व रेकर्ड कायम भएको भएता पनि कृषिको रेकर्डका लागि भने रामेछाप जिल्लाको पनि सम्भावना रहेको छ ।
जिल्लाको मन्थली नगरपालिका वडा नं. ५ को सुनारपानीमा अनारबाजे नामले परिचित एक कृषकको बारीमा फलेको अकबरे खुर्सानीले विश्व रेकर्ड कायम गर्न सक्ने सम्भावना छ । वास्तविक नाम हिरालाल आचार्य भएका कृषकले आफ्नो बगैचामा लगाएको अनारको प्रशिद्धिले नै उनले अनारबाजेको उपमा पाएका थिए ।
अनारबाजेको बगैचामा भएको अकबरे खुर्सानीको बोटको उमेर ८ वर्ष पुगेको छ । सामान्यतया १ वर्षमा उत्पादन दिएर मर्ने गरेको खुर्सानीमा यो भने अझै जिवितै छ ।
सुख्खा याममा पानीको अभाव हुँदा उनले सो खुर्सानीलाई बहुतै मेहनत गरेर पानी र मलखाद दिँदै हुर्काएका छन् । यो रिपोर्ट तयार पार्दा सम्म १८ फिट उचाई रहेको यो खुर्सानी प्रचार प्रसारको अभावमा विश्व रेकर्ड कायम गर्नबाट बञ्चित भएको छ ।
विगत केही वर्ष अघि दोलखा जिल्लाबाट विदेशमा धेरै परिमाणमा अकबरे खुर्सानी निर्यात भएको थियो । रामेछाप जिल्लामा पनि अकबरे खुर्सानीको अचार उद्योग समेत संचालनमा आएको छ । आफ्नो अग्लो अकबरे खुर्सानीको बारेमा थप जानकारी दिँदै कृषक अनारबाजे भन्छन्–
‘यो खुर्सानीको बोटलाई मैले गिनिज बुकमा नाम लेख्ने कामका लागि रोपेको होइन । यो त हुर्काउँदै जाँदा अग्लो भएर गिनिज बुकमा नाम लेखाउन लायक भएको मात्रै हो ।
आज सम्म यो खुर्सानीका कारण मेरो नाम गिनिज बुकमा लेखियोस् भनेर मैले कुनै प्रचारप्रसार गरेको छैन । आशा गरौं, दक्षिण भारतमा रहेको १४.७ फिट अग्लो खुर्सानीको बोटको रेकर्ड मेरो बगैचामा भएको १८ फिट अग्लो खुर्सानीको बोटले अवश्य तोड्ने छ ।’
अकबरे खुर्सानी स्वास्थ्यका दृष्टिकोणले समेत निकै प्रभावकारी छ । यसको नियमित सेवनले पेट सम्बन्धी रोगको निदान गर्न सकिन्छ ।आजभोलि खानपिनको कारणले मानिसको शारिरीक अवस्थामा परिवर्तन भएको छ जसको कारण मानिसलाई मोटोपनले सताउने गर्दछ । यस्तो समस्याको समाधानका लागि अकबरे खुर्सानी ज्यादै महत्वपूर्ण मानिन्छ ।
रगतमा चिनीको मात्रा बढेर हैरान हुने विरामी र पिसाबथैलीलाई सफा गर्ने कार्यका लागि पनि अकबरे खुर्सानीको विशेष महत्व रहेको छ ।
अनारबाजेले फलाएको खुर्सानीको कुनै प्रचारप्रसार हुन सकेको छैन । विश्व रेकर्डमा १४.७ फिट अग्लो खुर्सानी कायम भएको अवस्थामा उनको खुर्सानी भने १८ फिट अग्लो रहेको छ ।
यो खुर्सानीको बोटलाई सबै तिरबाट प्रचारप्रसार गरी समयमा विश्व रेकर्ड कायम गरी भारतको पोल्टोमा रहेको गिनिज बुक अफ् वल्र्ड रेकर्ड तोड्नु हामी सबैको कर्तव्य हो । तसर्थ यो भिडियोलाई बढी भन्दा बढी शेयर गरी प्रचारप्रसार गर्नुहुन सबै दर्शकहरुमा हामी हार्दिक अनुरोध गर्दछौं ।
बाँकी भिडियोमा…
