जेठ १६, जनता भ्वाइस संवाद्दाता, रामेछाप
कोरोना भाइरस (कोभिड १९) ले विश्वको अर्थ व्यवस्था डामाडोल भएको आजको अवस्थामा नेपाल सरकारको केन्द्रीय संसदले आगमी आर्थिक वर्ष २०७७–०७८ का लागि बजेट सार्वजनिक गरेको छ ।
रामेछाप जिल्लाका लागि २ अर्ब ९९ करोड ५२ लाख बजेट विनियोजन गरिएको सरकारी स्रोतले बताएको छ ।
बिहिवार विनियोजित बजेटमा रामेछापको २ नगरपालिका र ६ गाउँपालिकाका लागि कूल २ अर्ब ९९ करोड ५२ लाख रुपैयाँ बजेट विनियोजन गरिएको हो ।
बिहिबार सार्वजनिक भएको प्रस्तुत बजेटमा रामेछाप जिल्लामा रहेका २ वटा नगरपालिकाहरुका लागि कूल ९८ करोड ८९ लाख रुपैयाँ बजेट विनियोजन भएको हो । जसमा रामेछाप नगरपालिका लागि ४१ करोड ३ लाख रुपैयाँ, मन्थली नगरपालिकाका लागि ५७ करोड ५९ लाख रुपैयाँ रहेको छ । त्यस्तै अन्य ६ वटा गाउँपालिकाहरुका लािग क्रमसः उमाकुण्ड ३१ करोड ६८ लाख रुपैयाँ, खाँडादेवी ४० करोड १९ लाख रुपैयाँ, गोकुलगंगा ३३ करोड २४ लाख रुपैयाँ, दोरम्बा ३४ करोड १५ लाख रुपैयाँ, लिखु तामाकोशी ३२ करोड ९ लाख रुपैयाँ र सुनापति २९ करोड ५५ लाख रुपैयाँ बजेट छुट्याइएको हो ।
कृषि, पर्यटन र जडिबुटीका लागि प्रख्यात मानिएको जिल्लाका उत्तरी क्षेत्रका २ गाउँपालिका उमाकुण्ड र गोकुलगंगा गाउँपालिकाका लागि छुट्याइएको कूल बजेटलाई त्ततत् गाउँपालिकाहरुले कुन रुपमा प्रयोग गर्ने हुन् त्यो हेर्न बाँकी नै छ ।
त्यस्तै, चालु आर्थिक वर्षको बजेट कार्यान्वयन र त्यसको परिचालनमा जिल्लाको लिखु तामाकोसी गाउँपालिकालाई निकै सकस भएको थियो । यस्तो अवस्थामा पनि आर्थिक वर्षको अन्तिम चौमासिकमा बजेट विनियोजन भएर कार्यालय संचालन, तलब भत्ताको वितरण र सामाजिक सुरक्षा भत्ताको वितरण भन्द बाहेक अन्य कुनैपनि कार्यक्रम सम्पन्न हुन सकेका थिएनन् ।
यस्तो अवस्थामा आगामी आर्थिक वर्षका लागि विनियोजित बजेटलाई सो गाउँपालिकाले कुन रुपमा लिने हो, सो भने भोलिका दिनले नै बताउने छ ।
सरकारले आगामी आर्थिक वर्ष २०७७–०७८ को लागि विनियोजित बजेटमा ७ प्रदेशलाई समानीकरण, सशर्त, विशेष र समपुर अनुदान शीर्षकमा ९९ अर्ब ८७ करोड ३७ लाख रुपैयाँ बजेट विनियोजन गरिएको छ ।
