जेठ २५, जनता भ्वाइस संवाद्दाता, रामेछाप
मन्थली नगरपालिका स्वास्थ्य शाखाले आफू कोरोना भाइरसको संक्रमण नियन्त्रणका लागि तयारी रहेको जनाएको छ । नगरपालिकाले कोरोना भाइरस नियन्त्रणका लागि अवाश्यक पर्ने औषधि लगायत स्वास्थ्यकर्मीका लागि आवश्यक पर्ने पिपिई सेट समेत सबै स्वास्थ्य चौकीहरुमा उपलब्ध गराएको आइतबार जनता भ्वाइसलाई जानकारी दिएको हो ।
जनता भ्वाइससँग कुराकानी गर्दै मन्थली स्वास्थ्य शाखाका प्रमुख केशवराज फुँयालले यस्तो जानकारी दिएका हुन् । नगर क्षेत्रभित्र कोरोना भाइरसको संक्रमण फैलन नदिनका लागि जिल्ला दैवीप्रकोप उद्धार समितिसँग मिलेर आवश्यक पूर्वतयारीहरु पुरा गरिसकेको जानकारी दिएका छन् ।
‘मन्थली नगरक्षेत्रभित्र कुनै पनि बेला कोरोना संक्रमित व्यक्तिहरुलाई आइसोलेन वार्डमा नै राख्नु पर्ने अवस्था आयो भने त्यो बेलाको लागि कस्तो पूर्वतयारी गर्नु भएको छ ?’ भन्ने जनता भ्वाइसको जिज्ञासालाई सम्बोधन गर्दै फुँयालले अगाडि भने, ‘नगरका १४ वटै वडाहरुमा क्वारेन्टिन संचालन गर्न वडा प्रतिनिधिहरुलाई अह्राइसकेका छौं । कतिले बनाउने क्रममा भएको पनि जानकारी प्राप्त भएको छ भने कतिले बनाइसक्नु भएको छ । आइसोलेसन वार्डका लागि मन्थली स्वास्थ्य चौकी, तामाकोसी सहकारी अस्पताल र रामेछाप सामुदायिक अस्पतालमा बेडहरु बनाएका छौं ।’
कोरोना भाइरसको नियन्त्रण र रोकथामका लागि सबै नगरबासीहरुलाई फँुयालले आग्रह गरेका छन् । समाजिक दूरी कायम गर्दै संचारमाध्यमबाट आएका पूर्व साबधानीका कुराहरुलाई अनुशासित भइ पालना गर्न फूँयालको आग्रह समेत रहेको छ ।
