जेठ ३०
रामेछाप । नेपालमा कोरोना सङ्क्रमणको कारण मृत्यु हुनेको संख्या १६ पुगेको छ । बिहिबार अर्घाखाँचीमा थप एक जनाको मृत्यु भएको हो । उनीले अस्पतालबाट फर्कँदै गर्दा ज्यान गुमाएको र मृत्यु पछिको परीक्षणमा कोरोना भाइरस संक्रमणको रिपोर्ट पोजेटिभ आएको जिल्ला स्वास्थ्य कार्यालयका जनस्वास्थ्य निरीक्षक गणेशराज पौडेलले जानकारी दिए । उनी मालारानी गाउँपालिका ४ का ५७ वर्षीय पुरुषको हुन ।
उनको घाँटीको शल्यक्रिया गरिएको र श्वासप्रश्वासमा समस्या आएपछि उपचारको लागि गत मङ्गलबार जिल्ला अस्पताल सन्धिखर्कले लुम्बिनी प्रादेशिक अस्पताल बुटवल पठाएको रेफर गरेको थियो । तर अस्पतालले सामान्य उपचारपछि घरमै आराम गर्न सुझाव दिएपछि उनी घर फर्कदै गर्दा बिहिबार बाटोमै ज्यान गएको हो ।
यसअघि १४ दिनदेखि ब्याडापाटाको सार्वजनिक आधारभूत विद्यालयको क्वरेण्टीनमा बसेका उनको गएको शुक्रबार नै पठाइएको नमुना हराएपछि बिहिबार फेरि स्वाब सङ्कलन गरेर परीक्षण गर्दा कोरोना पोजिटिभ भएको पाइएको हो । रिपोर्ट नआउँदा हिजोदेखि नै शव रातुको चौरमा बेबारिसे अवस्थामा राखिएको समाचार अर्घाखाँचीका संचारकर्मी प्रेमनारायण आचार्यले लेखेका छन् ।
योसँगै नेपालमा कोरोना सङ्क्रमणको कारण ज्यान गुमाउनेको सङ्ख्या १६ पुगेको छ । स्वास्थ्य तथा जनसङ्ख्या मन्त्रालयले भने यसको पुष्टि गर्न बाँकी छ । बिहिबार नेपालमा थप २ सय ५० जनामा कोरोना संक्रमण भएको छ । जसमध्ये २५७ जना पुरुष र २२ महिला रहेका छन् । यससँगै नेपालमा कोरोना भाइरस संक्रमण भएका व्यक्तिहरुको संख्या ४ हजार ६ सय १४ जना पुगेको प्रवक्ता डा जागेश्वर गौतमले बताए ।
हाल नेपालको ७२ जिल्लामा कोरोना संक्रमण फैलिएको छ । त्यस्तै मन्त्रालयका प्रवक्ता गौतमका अनुसार विगत २४ घण्टामा १ सय ८७ जना डिस्चार्ज भएका छन् । डिस्चार्ज हुनेको कुल संख्या हालसम्म ८ सय ६१ पुगेको छ । file Photo
