जेठ २९, जनता भ्वाइस संवाददाता, रामेछाप
रामेछापका सहयोगी मनहरुले पुर्ननिर्माण गरेको रामेछाप नगरपालिका वडा नं. ८ को बिटार पार्कलाई वडा तथा नगरस्तरबाट सहयोग हुने सोही वडाका वडाध्यक्ष केदार कार्कीले बचन दिएका छन् । युवाहरुले उत्साहपूर्वक गरेको काममा आफ्नो सदैव सहयोग हुने प्रतिबद्धतासमेत उनले व्यक्त गरेका छन् ।
जनता भ्वाइससँग कुराकानी गर्दै कार्की भन्छन्, ‘बिटार जस्तो ठाउँमा यत्तिको पार्क बन्नु राम्रो कुरा हो । यो पार्कलाई अझ व्यवस्थित बनाउन धेरै कामहरु गर्न बाँकी छ । यहाँहरुको यो कामलाई देखेर मलाई पनि वडास्तरबाट बजेटको व्यवस्था गर्न मन लागेको छ । मन्थलीबाट यहाँ आएर सुस्ताउनका लागि उपयुक्त स्थान बनेको छ । यहाँ अझै पानी पर्दा समेत ओत लाग्ने व्यवस्था गर्न जरुरी छ ।’
यो पार्क निर्माणको लागि डिपिआर तयारी गर्नुपर्ने र त्यसै अनुसार काम गर्दा राम्रो हुने धरणा समेत उनले राखेका छन् । डिपिआर गर्दा पुरानो स्वरुपलाई बिगार्न नहुने तथा हिजो पार्क निर्माण सुरु गर्दाको समयमा समेत कमजोरी भइसकेको उनको भनाई छ ।
उक्त स्थानमा भएको ठूलो चौरलाई चिरेर सडक बनाएको तर्फ औल्याउँदै कार्की अगाडि थप्छन्, ‘यो सुन्दर चौरलाई हिजै बिगारि सकिएको छ । हामी निर्वाचित् भएर आएपछि यसलाई यो स्वरुपमा ल्याइएको होइन । हामी सबै जना मिलेर बिटारको पार्कलाई अझ सुन्दर बनउनु पर्छ ।’
कार्कीले बीचमा चिरिएको चौरलाई दुई तर्फ जोड्नको लागि पुलको व्यवस्था हुनुपर्ने र सो कार्यका लागि डिपिआर तयार गरेरै जानुपर्ने धारणा अगाडि सारेका छन् ।
