अद्यावधिक नक्सा समेटिएको खुसियालिमा अनेरास्वबियू र राष्ट्रिय युवा संघद्वारा दीप प्रज्वलन

जेठ ३१,

रामेछाप । प्रतिनिधिसभा बैठकबाट नेपालको अद्यावधिक नक्सा समेटिएको ‘नेपालको संविधानको (दोस्रो संशोधन) विधेयक, २०७७’  दुई तिहाइ भन्दा बढी मतले पारित भएको खुसियालिमा अनेरास्वबियू जिल्ला कमिटी,रामेछाप र राष्ट्रिय युवा संघ नेपाल रामेछापले संयुक्त रुपमा दीप प्रज्वालन गरेका छन् । शनिबार साँझ रामेछापको सदरमुकाम मन्थलीमा दीप प्रज्वालन गरिएको हो ।

शनिबारको प्रतिनिधिसभा बैठकले लिम्पियाधुरासहितको नक्सा पारित गर्ने ऐतिहासिक निर्णय गरेको हो । संशोधन प्रस्तावमाथिको दफावार छलफलपछि निर्णयका लागि संसदमा मतदान भएको थियो । जसअनुसार संविधान संशोधनका लागि भएकाे मतदानमा २५८ मत खसेकोमा पक्षमा सबै २५८ र विपक्षमा कुनै पनि मत परेन । २७५ सदस्सीय संसदमा २५८ मत खसेसँगै संशोधन विधेयक दुई तिहाई भन्दा बढी मतले पारित भएको सभामुख अग्नि सापकोटाले घोषणा गरेका थिए ।

मतविभाजनमा जानु अघि ५ मिनेट सम्म घण्टी बजाएर बाहिर हुने सांसदलाई सभामा प्रवेश गराईएको थियो ।  २७५ सदस्सीय संसदमा मतदानबाट २५८ मत खसेसँगै संशोधन विधेयक दुई तिहाई भन्दा बढी मतले पारित भएको हो ।

यो पनि पढनुहोस्
ऐतिहासिक निर्णय : नयाँ नक्सा समेटिएको संविधान संशोधन विधेयक २ तिहाइ भन्दा बढीमतले पारित

सो अवसरमा बोल्दै अनेरास्वबियू जिल्ला कमिटी संयोजक सागरहरी अधिकारीले यो ऐतिहासिक कदम चाल्ने नेपाल सरकारलाइ धन्यवाद व्यक्त गरे । र नक्सामा समेटिएको भूमी अब कुटनीतिक पहल मार्फत फिर्ता गर्दै कालापानीमा बसेको भारतिय सेना तत्काल हटाउनु पर्नेमा जोडदिए । उनले शुक्रबार नेपाल विद्यार्थीसंघले सरकार बिरुद्ध निकालेको मसाल जुलुसमा नेपालको संसदमै राष्ट्रघाती अभिब्यक्ती दिने सरिता गिरीका बिरुद्ध नबोलेको देख्दा दु : ख लागेको तर्क गरे ।

नेपाल सरकारले गत जेठ ७ गते नेपालको नयाँ राजनीतिक नक्सा जारी गरेको थियो । जसमा लिम्पियाधुरा, कालापानी लिपुलेक क्षेत्र समेटिएको छ ।

दीप प्रज्वालन कार्यक्रमा नेपाल कम्युनिस्ट पार्टी (नेकपा) जिल्लाका नेताहरुको पनि सहभागिता रहेको थियो । Photo : Puskar Bhattarai