जेठ ३०, जनता भ्वाइस संवाददाता, रामेछाप
रामेछाप नगरपालिका वडा नंं. ३ का वडाध्यक्ष भूपालराज श्रेष्ठले चालु आर्थिक वर्षमा वडामा प्राप्त बजेटलाई कृषि कार्यका लागि उच्चतम् उपयोग गरेको बताएका छन् । समग्रमा कृषि यान्त्रिकरणका लागि आफ्नो वडाले विगत वर्षको बजेटलाई प्रयोग गरेको बताएका हुन् । रामेछाप नगरपालिकाले विभिन्न क्षेत्रमा पकेट क्षेत्र घोषणा गरेको बताउँदै वडाध्यक्ष श्रेष्ठले सिङ्गो रामेछाप क्षेत्रकै खेतीयोग्य जमिन साँघुटार क्षेत्रमा भएकोले त्यसलाई अन्न र माछाको पकेट क्षेत्र बनाइने रणनीति रहेको बताएका हुन् ।
‘आउँदो कार्यकालका लागि तपाईंलाई नै भोट दिएर जिताउनु पर्ने कारण केके हुन् त्यहाँका नागरिकहरुले ?’ भन्ने जनता भ्वाइसको जिज्ञासामा श्रेष्ठ भन्छन्, ‘मलाई नै जिताउनु पर्छ भन्ने हुँदैन । तर मेरा वडाका नागरिकहरुले भूपाल को हो र उसले केके कामहरु गरेको छ भन्ने बुझ्नुभएको छ । तसर्थ मलाई भेट दिनुपर्ने या नपर्ने भन्ने कुरा मैले निर्धारण गर्न सक्दिन ।’
आफूले विगतको चुनाव भन्दा अघि लिएका लक्ष्यहरु पुरा हुँदै आएको र आफूले हिजोका दिनमा पनि वडाबासीहरुलाई त्यस्तो ठूलो सपना नबाँढेको बताएका छन् । यति हुँदाहुँदै पनि आफ्नो वडामा खानेपानीको चरम अभाव भएको र सो कामका लागि पनि केन्द्र, प्रदेश र स्थानीय सबै सरकारहरुसँग समन्वय भइरहेको श्रेष्ठले बताएका छन् ।
