जेठ ३२, जनता भ्वाइस संवाददाता, रामेछाप
मन्थली नगरपालिका वडा नं. ८ का वडाध्यक्ष राजकुमार श्रेष्ठले चालु आ.व.मा तर्जुमा भएका ११ वटा योजनाहरु निर्माण समिति गठनगरि सम्पन्न गरिसकेको जानकारी दिएका छन् । लामो समयदेखि खानेपानीको समस्या रहेको चिसापानीमा लिफ्ट सिस्टमबाट खानेपानी उपलब्ध गराउँदा यहाँका वडाबासीहरु खुशी भएको बताएका छन् । विगत वर्षका दिनहरुमा भएका योजनाहरुलाई आफूले यस वर्षको कार्यक्रममा समेत निरन्तरता दिएको जनाएका छन् ।
‘सम्भावित कोरोना माहामारीको जोखिमलाई ध्यानमा राख्दै सर्तकताको लागि के सोच्नु भएको छ ?’ भन्ने जनता भ्वाइसको जिज्ञासामा श्रेष्ठ भन्छन्, ‘हामीले हाम्रो वडालाई कोरोनाको जोखिमबाट बचाउन केही समय अघि हामीले गाइखुरा भन्ने ठाउँ हेल्थ हेल्प डेक्स् संचालन गरेका थियौं । त्यसबाट धेरै बहिरबाट आउने नागरिकहरुले सेवा पाउनु भएको छ । हाम्रो मात्रै वडा नभएर मन्थली ९, १०, ११ र १२ सबै वडाका वडाबासीहरुलाई त्यसले सहयोग पुग्यो । आगामी वर्षको बजेटमा पनि हामी स्वास्थ्यको क्षेत्रलाई विशेष महत्वका साथ समेट्छौं ।’
आफूले चुनावको बेला बनाएको घोषणापत्रलाई आफूले आधार बनाएर काम गरिरहेको श्रेष्ठले बताएका छन् । चुनावको घोषणापत्रकै आधारमा त्यसैलाई मार्ग दर्शक बनाएर वडाको वृहत्तर हितको लागि काम गरिरहेको श्रेष्ठको दावी रहेको छ ।
कोरोना भाइरसको जोखिमलाई ध्यानमा राख्दै बाहिरबाट आएमा जो कोही आफन्त भए पछि सिधै घरमा नलैजान श्रेष्ठले आफ्ना वडाबासीहरुलाई आग्रह गरेका छन् । ‘कोरोनको सन्दर्भमा मेरो मान्छे भनेर लापर्वाही नगरौं ।’
