असार ७
रामेछाप । हिमालपारिको जिल्ला मुस्ताङमा पनि कोरोना सङ्क्रमित रहेको पुष्टि भएको छ । स्वास्थ्य कार्यालय मुस्ताङका निमित्त कार्यालय प्रमुख टीकाराम भण्डारीका अनुसार मुस्ताङको घरपझोङ गाउँपालिका-१ मा रहेको तिब्बतियन क्याम्पमा बस्दै आएका ८३ वर्षीय पुरुषमा कोरोना सङ्क्रमण रहेको पुष्टि भएको हो ।
गत जेठ ३१ गते काठमाडौंको बौद्धबाट मुस्ताङ पुगेका ती पुरुषको आरडिटी टेस्टमा पोजेटिभ देखिएका कारण असार १ गते जोमसोममा रहेको आइसोलेसन कक्षमा राखिएको थियो ।
त्यस्तै गण्डकी प्रदेशमा फेरि ५० जना कोरोना भाइरसका संक्रमित थपिएका छन् । गण्डकी प्रदेश सरकार स्वास्थ्य निर्देशनालयका अनुसार हिजो बेलुका तनहुँ, बागलुङ, नवलपरासी पूर्व र मुस्ताङमा संक्रमित भेटिएका हुन् । मन्त्रालयका निर्देशक डा. बिनोदबिन्दु शर्माका अनुसार तनहुँको ब्यास नगरपालिकामा २७ र ४० वर्षीय पुरुषमा कोरोना संक्रमण भएको छ ।
त्यसैगरि बागलुङको गलकोट नगरपालिका, तारा खोला गाउँपालिका र बडिगाड गाउँपालिकामा २९ जना नयाँ संक्रमित भेटिएका छन् । त्यसैगरि नवलपरासी (बर्दघाट सुस्ता पूर्व) को मध्य विन्दु नगरपालिकामा १८ जना नयाँ संक्रमित भेटिएका छन्। उनीहरु सबैजना सम्बन्धित पालिकाका क्वारेन्टाइनमा रहेका शर्माले बताए ।
हिजै नेपालमा कोरोनाभाइरस संक्रमितको संख्या आठ हजार ६०५ पुगेको स्वास्थ्य तथा जनसंख्या मन्त्रालयको नियमित ‘प्रेस ब्रिफिङ’मा प्रवक्ता डा. जागेश्वर गौतमले जानकारी दिएका थिए । हालसम्म मृत्यु हुनेको संख्या २२ रहेको छ ।
त्यस्तै कोरोनामुक्त भइ अस्पतालबाट १८ जना महिलासहित १७६ जना ‘डिस्चार्ज’ भएका छन् । योसँगै नेपालमा कोरोना निको हुनेको संख्या १ हजार ५ सय ७८ पुगेको छ । जसमा महिला १४१ जना र पुरुष १ हजार ४ सय ३७ जना रहेका उनले जानकारी दिए । file Photo
