साउन २१, जनता भ्वाइस संवाददाता, रामेछाप ।
लिखु तामाकोशी गाउँपालिका वडा नं. २ ले असिना पानीबाट पीडित किसानहरूलाई क्षतिपूर्तिका लागि नगद वितरण गरेको छ । बैशाख २८ गतेको असिना पानीका कारण क्षति भएको साविक सैपु ८ र ९ नं. वडाका किसानहरूलाई वडाले सो रकम वितरण गरेको हो ।
वडा कार्यालयले पूर्ण, मध्यम र न्यून क्षति गरि ३ तहमा क्षतिको विवरण मूल्याङ्कन गरी राहत रकम वितरण गरेको सो वडाका वडा अध्यक्ष पदम तमाङले जानकारी दिए । वडाले पूर्ण क्षति भएका किसानहरूलाई प्रति कृषक रू ४ हजार, मध्यमलाई ३ हजार र न्यूनलाई २ हजारका दरले क्षति वापतको राहत रकम वितरण गरेको हो ।
त्यस्तै वडाले सैपु एग्रो फार्मलाई भने २० हजार सहयोग गरेको छ । वडाले गरेको यस सहयोगबाट १ सय २२ किसान लाभान्वित भएका छन् ।
बैशाख २८ गतेको असिनापानीका कारण सैपुको माथिल्लो भेगको आलु र मकै पूर्ण रुपमा क्षति भएको थियो र सैपु एग्रो फार्मको भने एभोगार्डो, ओखर, किवी लगायत क्षति भएको थियो । यो फार्ममा सामुहिक खेती हुँदै आएको थियो । राहत रकम वितरण कार्यमा गाउँपालिका अध्यक्ष गोविन्दबहादुर खड्काको समेत उपस्थिति थियो ।
