साउन ३२ । जनता भ्वाइस संवाददाता, रामेछाप
जिल्ला आयोजना कार्यान्वयन इकाई, अनुदान व्यवस्थापन तथा स्थानीय पूर्वाधार कार्यालयका कर्मचारीहरु आफ्नो कार्यस्थलमा नियमित कार्यस्थलमा कार्य सम्पादन गर्न त्रसित भएका छन् ।
आफूहरुको कार्यालय रहेको घरमा नै होम आइसोलेशनमा कोरोना संक्रमित बिरामी रहेका कारण आफूहरुलाई नियमित रुपमा कार्यसंचालनमा असहज भएको उनीहरुले बताएको सो कार्यालयका कार्यालय प्रमुख गणेश अर्यालले बताएका छन् ।
जनता भ्वाइससँग कुराकानी गर्दै सो कार्यालयका प्रमुख अर्यालले आफ्ना कर्मचारीहरुले कार्यालयमा आएर काम गर्न असहज मानेको बताएका हुन् ।
‘हाम्रा कर्मचारी र संक्रमितले प्रयोग गर्ने फ्ल्याट तथा ट्वाइलेट बाथरुम सबै अलग अलग छ । सिधा हेर्ने हो भने त हामीलाई संक्रमितको कारणले कुनै असर पर्ने त होइन । तर पनि कर्मचारीहरुले सो कुरालाई सहज लिन सकेका छैनन् । कोरोनाको सम्भावित संक्रमित हुनुभन्दा बरु जागिर नै किन खाने भन्ने सोच कर्मचारीहरुमा रहेको छ ।
यो उहाँहरुको मनोबैज्ञानिक त्रास हो । यस्तो अवस्थामा पनि हामीले अत्यावश्क काम भन्दा बाहेक कार्यालय संचालन गर्न सकेका छैनौं ।’
‘ज्यान कि जागिर’ भन्ने सोचमा कर्मचारीहरु रहेको अर्याल बताउँछन् । टाढाटाढा गुम्देलदेखि आउने सेवाग्राहीहरुलाई सेवा प्रवाह गर्नकै लागि भएपनि कार्यालयमा केही कर्मचारीहरुलाई राखेर भएपनि आकस्मिक कार्य सम्पादन गरिरहेको उनले बताएका छन् ।
‘के त्यसोभए कार्यालयको नियमित कार्यसम्पाद नै बन्द गर्नुपर्ने अवस्था आएको हो ?’ भन्ने जनता भ्वाइसको जिज्ञासामा अर्याल भन्छन्, ‘त्यसो होइन । कार्यालयको काम थोरै जनशक्तिको परिचालन गरेर आकस्मिक रुपमा चलेको छ । कार्यालय नै बन्द गर्न त जिल्ला प्रशासन कार्यालयको निर्देशन आउनु पर्छ । कार्यालय नै बन्द गर्ने कुरा त हुँदैन ।’
अत्यावश्यक कामका लागि मात्रै कार्यालय संचालन गरिने तथा म्याद भित्र गरिसक्नु पर्ने कामहरु मात्रै आफूहरुले सम्पादन गरेर पठाउने गरेको अर्याल बताउँछन् ।
‘यस्तो अप्ठ्यारो अवस्थामा कार्यालयमा आएरै काम गर्न भनेर मैले कर्मचारीहरुलाई भन्न सक्दिन । मानवीय अवस्थालाई पनि त हेर्नुपर्यो ।’ अर्याल अगाडि भन्छन् ।
अर्याल कोरोनाका कारण विश्व नै थलिएको अवस्थामा हामीले पनि त्यसको मार भोग्नुपर्ने कुरामा आफूहरु प्रष्ट रहेको बताउँछन् । अब पछिल्लो समयमा ‘वर्क फर होम’ भन्ने अवधारणा आपूmहरुले अपनाइरको उनले बताएका छन् ।
