भदौ ०३ । जनता भ्वाइस संवाददाता, रामेछाप
जिल्ला प्रशासन कार्यालय, रामेछाप सहितको टोलीले हिजो जस्तै आज बुधकार पनि बजार अनुगमन गरेको छ ।
घरेलु तथा साना उद्योग कार्यालय, जिल्ला प्रहरी कार्यालय, कृषि ज्ञान केन्द्र, उपभोक्ता हित संरक्षण मञ्च लगायत पत्रकार सहित्को टोलीले विभिन्न २६ वटा पसलहरुमा अनुगमन गर्दा विभिन्न वस्तुहरुको बरामद गरेको छ ।
टोलीले मन्थली बजारका विभिन्न १७ वटा किराना र खाद्यान्न तथा सप्लायर्स, बेकरी र डेरी १–१ वटा, होटल २ वटा र तरकारी तथा फलफूल पसल १ वटा गरी २६ वटा पसलहरुमा अनुगमन गरेको हो ।
टोलीले गरेको अनुगमनका क्रममा अनमिका स्टोर्स, मन्थलीले म्याद नाघेको र सडेगलेको तथा लेबल नखुलेको विभिन्न खाद्यान्न बिक्री गरिरहेको पाईएकोले उक्त स्टोर्सलाई बीस हजार रुपैयाँ र गणेश टायर सेन्टर, मन्थलीले अनुगमन टोलीलाई खरिद तथा बिक्री बिल बिजक माग गरेको बखत उपलब्ध नगराएकोले कारण दश हजार रुपैयाँ जरिवाना गरेको छ ।
विभिन्न कारणले दर्ता नगरी संचालन गरेको एउटा तरकारी पसललाई ७ दिन भित्र घरेलु तथा साना उद्योग कार्यालयमा आई दर्ता गरी संचालन गर्न निर्देशन दिइएको छ भने कोरोना भाइरस (कोभिड १९) का कारण आफ्ना ग्राहकहरुको स्वास्थ्य संवेदनशीलतालाई ध्यानमा राखी महामारीको समयमा उद्योग, वाणिज्य तथा आपूर्ति क्षेत्रले अपनाउनु पर्ने सुरक्षा मापदण्डको बारेमा व्यवसायीहरूलाई सचेत समेत गराईएको छ ।
बजार अनुगमनको अवस्थालाई मध्येनजर गर्दै अनुगमन टोलीले हालका लागि बजारमा खाद्यान्नको अभाव नभएको निश्कर्ष निकालेको छ ।
