भदौ २४ । जनता भ्वाइस संवाददता, रामेछाप
यस वर्षको अन्तराष्ट्रिय बाल दिवस मन्थली नगरपालिकाले कविता प्रतियोगिता गरी मनाउने निर्णय गरेको छ ।
‘विपद्मा बालबालिकाको सुनिष्चितता : हामी सबैको साझा प्रतिवद्धता’ भन्ने मूल नाराका साथ मनाउने लागिएको यस वर्षको अन्तराष्ट्रिय बालदिवसका अवसरमा नगरपालिकाले भर्चुअल पद्धतिबाट कविता प्रतियोगिताको आयोजना गरेको हो ।
प्रतियोगिता रेडियोको माध्यमबाट हुनेछ । रामेछाप डाँडामा रहेको हजुरको रेडियोले बालबालिकाहरुको कविता संकलन गर्नेछ भने बालबालिकाहरुले आफ्ना कविताहरु विभिन्न विद्युतीय माध्यमबाट मन्थली नगरपालिकाको शिक्षा शाखामा पठाउनु पर्ने प्रावधान समेत राखिएको छ ।
मन्थली नगरपालिकाका २२ वटै माध्यमिक तहका विद्यालयहरुका २–२ जना विद्यार्थीहरु सहभागिता हुनुपर्ने नगरपालिकाले जनाएको छ भने कविताहरु हजुरको रेडियो बालबालिकाहरुसँग समन्वय गरी संकलन गर्नेछ ।
आगामी भाद्र २७ गते बिहान ११ बजेसम्म आफ्नो कविता विद्युतीय माध्यमबाट पठाइसक्न पालिका क्षेत्रभित्रका विद्यालयहरुलाई नगरपालिकाले पत्राचार गरिसकेको छ ।
उक्त कविता प्रतियोगितमा गद्य र पद्य दुवै छन्दका कविताहरु समावेश हुन सक्नेछन् भने १ सय ५० शब्दमा समापन गर्नुपर्ने प्रावधान समेत नगरपालिकाले तोकेको छ ।
प्रतियोगी कविताहरु अन्तराष्ट्रिय बाल दिवस भदौ २९ गतेका दिन हजुरको रेडियो लगायत मन्थलीका सबै रेडियोहरुले एकसाथ प्रशारण गर्नेछन् ।
