भदौ २५ । जनता भ्वाइस संवाददाता, रामेछाप
पालिका क्षेत्रकै स्थानीयहरुको विरोधलाई चिर्दै अन्ततः खाँडादेवी गाउँपालिकाले पालिका स्तरीय अस्पताल निर्माणको कार्यलाई सुरु गरेको छ ।
गाउँपालिका नजिकै रहेको गोगनपानी बजारभन्दा केही माथि सुलिथुम्का सामुदायिक वन सँगैको खाँडादेवी अस्पतालको ३ रोपनी जग्गामा १५ शैयाको अस्पताल बनाउने कार्य पालिका अध्यक्ष प्रेमबहादुर तामाङले आज शिल्यान्यास गरेका हुन् ।
प्रदेश र केन्द्र सरकारको कूल १५ करोड लागनीमा बन्न लागेको सो अस्पताल खाँडादेवी गाउँपालिका भित्रै सुविधा सम्पन्न बनाउने लक्ष्य रहेको अध्यक्ष तामाङ्ले जानकारी दिएका छन् ।
विगत केही दिन अघि आज भवनको शिल्यान्यास भएको जग्गाको विवाद् सतहमै आएको थियो । सोही पालिकाको माकादुमबासीले सो स्थानमा अस्पताल बनाउने कुराका विरोध गरेका थिए । विरोधका बाबजुद् समेत अध्यक्ष तामाङ्ले नागरिकहरुको प्रत्यक्ष सरोकार राख्ने स्वाथ्य जस्तो संवेदशील विषयमा विरोध गर्नेहरु विकास विरोधी भएको बताउँदै विरोधकै बाबजुद् भवन निर्माण कार्यको आरम्भ गरेका हुन् ।
खाँडादेवी गाउँपालिका उपाध्यक्ष मखमली श्रेष्ठ, नेकपाका नेता आनन्द श्रेष्ठ, मन्थली ७ नं. वडाका वडाध्यक्ष सुदर्शन प्रसाई र स्थनीयबासी लागयत ३० जना भन्दा बढीको उपस्थितिमा भवनको शिल्यान्यास भएको हो ।
भवनको शिल्यान्यास गरेपछि जनता भ्वाइससँग संक्षिप्त प्रतिक्रिया दिँदै अध्यक्ष तामाङ्ले भने, ‘केही सामान्य विरोध आएपनि आजबाट अस्पताल बनाउने काम सुरु भएको छ । यसले समग्र खाँडादेवी बासीलाई खुशी दिलाएको मैले महसुस गरेको छु । सकेसम्म चाँढो भन्दा चाँढो यो निर्माणको यात्रालाई सिध्याई पालिकाबासीलाई यहाँबाट सेवा प्रवाह गरिनेछ । आजको दिनसम्म यो अस्पताल निर्माणको कार्यमा सहयोग गर्ने सबैप्रति आभार व्यक्त गर्न चाहन्छु ।’
पालिकाले निमार्ण गर्ने अस्पतालको कार्यमा सबै पालिकाबासीलाई सहयोग गर्न समेत तामाङले आग्रह गरेका छन् ।
