एजेन्सी । अमेरिकी राष्ट्रपतिको चुनावका लागि अब तीन हप्ताभन्दा कम समय बाँकी रहँदा बाइडेन र ट्रम्प दुवै उमेदवारहरु यतिबेला बचेको समयलाई सक्दो सदुपयोग गर्नतर्फ लागि परेका छन् । मेल–इन भोटिङ अनि प्रारम्भिक मतदान सुरु भइसके पनि राष्ट्रपति ट्रम्प कोरोना भाइरसका कारण अवरोध हुन पुगेको चुनाव अभियानको भर्पाइ गर्न अहिले आयोवा स्टेट पुगेका छन् । कोरोना संक्रमित भएपछि ट्रम्प पहिलोपटक चुनाव प्रचार अभियानका लागि भनेर सोमबर राति फ्लोरिडा गएका हुन् । त्यसअघि ह्वाइटहाउसले उनको परीक्षण केही दिनदेखि लगातार नेगेटिभ आएको जानकारी दिएको थियो ।
नोभेम्बर ३ का दिन तय निर्वाचानका लागि अहिलेसम्म १ करोडभन्दा बढी अमेरिकी नागरिकहरुले मेलबाट या व्यक्तिगत रुपमा मतदान गरिसकेका छन् । मंगलबार टेक्सस र जर्जियामा भएको प्रारम्भिक मतदानमा अमेरिकीहरु घण्टौँ लामो लाइन बसेर आफ्नो पालो पर्खिरहेकाबारे सामाजिक संजालमा अधिक चर्चा भएको छ ।
चुनावका दिन बढी भीडभाड हुन सक्ने हुँदा कोरोना संक्रमणको डरले धेरै मानिसहरु अहिले नै मतदान गर्न हतारिरहेको बताइएको छ । प्रारम्भिक मतदान बुधबार पनि तीनवटा स्टेट कनसस, रोडे आइलन्ड अनि टिअनिजमा सम्पन्न हुनेछ ।
यता, पूर्वप्रथम महिला मिशेल ओबामा र बास्केटबल खेलाडी, एनबीएका स्टार लेब्रोन जेम्स मतदानका लागि आएका नागरिकलाई सुरक्षाका उपकरण, खानेकुरा अनि निःशुल्क कानुनी सुझाव, यातायातलगायतका सेवा प्रदान गर्न संयुक्तरुपमा लागि परेका हुन् । त्यसैगरी हालै गरिएको अर्को एक सर्वेक्षणमा भारतीय अमेरिकीहरुमा ७२ प्रतिशत बाइडेनको पक्षमा रहेको र उनैलाई मत हाल्ने तयारी गरेको देखिएको छ ।
यसअघि प्रधानमन्त्री मोदी र ट्रम्पबीचको बलियो सम्बन्ध अनि भारतको मानव अधिकार रेकर्डबारे बाइडेन प्रशासनको आलोचना पश्चात् ट्रम्पको समर्थन बढ्नेमा डेमोक्रेटहरु चिन्तित थिए । तर अहिले प्रायः भारतीय–अमेरिकी नागरिकहरु दुई देशबीचको कुटनीति भन्दा पनि अमेरिकाको अर्थतन्त्र अनि स्वास्थ्य सेवालाई बढी प्राथमिकतामा राखेर निर्णय लिन चाहेको पाइएको छ ।
हाल ट्रम्प आयोवाको डेस मोइनेसमा र्याली अभियान सञ्चालन गरिरहेका छन् भने उता बाइडेन अनि सेनेटर कमला ह्यारिस चाहिँ मुसलमान समूहहरुलाई अभिवादन गर्न पुगेका हुन् । उपराष्ट्रपति माइक पेन्स पनि मिचिगेनमा चुनाव प्रचार अभियानकै लागि व्यस्त छन् ।
तर, निर्वाचनको दिन नजिकिनै लाग्दा ट्रम्प आयोवा पुग्नुले उनी पुनः निर्वाचित हुने आशाबारे केही चिन्ताजनक संकेत दिएको पनि बताइएको छ । किनकि २०१६ मा उनले डेमोक्रेटकी उमेदवार हिलारी क्लिन्टनलाई त्यहीँबाट १० प्रतिशत मतले हराएका थिए । तर, हालै गरिएको केही सर्वेक्षणमा भने उनी र बाइडेनबीच कडा प्रतिस्पर्धा रहेको देखिएको छ ।
त्यसैगरी आयोवामा अहिले कोरोना संक्रमणको दर पनि अधिक वृद्धि हुँदा अस्पताल भर्ना हुनेको सङ्ख्या हालसम्मकै उच्च बिन्दुमा पुगेको छ । तरपनि रिपब्लिकन गर्भनर किम रेनोल्डस मास्क अनिवार्य गर्ने लगायतका उपाय अपनाउने विरुद्धमा रहँदै आएकी छन् ।
यो हप्ता पनि उनले ट्रम्पका समर्थकलाई समूहमा आउन भनेर सामाजिक संजालमार्फत भनेकी हुन् ।
यसैबीच, मंगलबार नै ट्विटरले ट्रम्पका अस्वेत समर्थक भएको दाबी गर्ने थुप्रै फेक अकाउन्टहरु डिलिट गरिदिएको छ । अरुलाई झुक्याउन खोजेको र अफवाह फैलाइरहेकाले ट्विटरको नियम उल्लंघन भएको बताउँदै कम्पनीले अकाउन्ट डिलिट गरिदिएको बताएको छ । चुनावका समयमा गलत सूचना प्रवाह गर्ने सम्बन्धी फेसबुक, ट्विटरलगायत सबै सामाजिक संजालका प्लेटफर्महरुले गम्भीर कदम उठाउने यसअघि प्रतिज्ञा गरेका थिए ।
२०१६ को राष्ट्रपति निर्वाचनमा रुसले फेसबुक लगायत विभिन्न साधनमार्फत चुनावमा हस्तक्षेप गरेको पाइएको थियो । ट्रम्पलाई जिताउन चलखेल भएका सम्बन्धी एफबीआईले अनुसन्धान पनि गरेको थियो जसलाई उनले नकार्दै आएका छन् । त्यसैले योपटक त्यस्तो हुन नदिन साइबर सुरक्षा निकायहरु सतर्क भएर लागिरहेको बताइएको छ भने ट्वीटर अनि फेसबुकले पनि चुनावलाई प्रभावित गर्ने गलत किसिमका पोस्ट र अकाउन्टहरु हटाइरहेका छन् । रोयटर्सबाट
