मंसीर ०९, रामेछाप ।
कृषक जागरण कृषि सहकारी संस्था मन्थलीमा गत भदौ २ गते लागेको ताला आज खुलेको छ । जिल्ला प्रशासन कार्यालय, घरेलु तथा साना उद्योग विकास समिति, जिल्ला प्रहरी कार्यालयका प्रतिनिधि, उद्योग वाणिज्य संघका प्रतिनिधि र पत्रकार सहितको रोहवरमा आज सो ताला खुलेको हो ।
एमोनियम सल्फेट नामक मल दिन्छु भनि कृषकलाई युरियामल बेचेका लामाले मल बापत लिएको रकम भने एमोनियम सल्फेटकै रहेको थियो । प्रतिबोरा ८ सय ४६ रुपैयाँ पर्ने मल लामाले १ हजार ८ सय रुपैयाँका दरले बेच्दा कृषकहरुलाई ९ सय ५४ रुपैयाँ बढी तिर्नुपरेको थियो ।
विगत ३ महिना भन्दा बढी समयदेखि आफ्नो गोदाममा लागेको ताला खुल्दा लामाले काम गर्दा नजानेरै गल्ती भएको प्रतिक्रिया दिएका छन् । जनता भ्वाइससँग कुराकानी गर्दै लामा भन्छन्, ‘यो उमेरमा जेल बस्न त रहर थिएन । काम गर्दै जाँदा भएको कामजोरीको कारणले यस्तो भयो । सरकारले लगाएको कानुनको पालना गर्नै पर्यो । अब फेरि मल बेच्ने या नबेच्ने भन्ने मेरो कुरा हो ।
बढी मूल्य लिएर मल बेचेको आरोपमा लामालाई सोही दिन प्रहरीले पक्राउ गरी अनुसन्धानको लागि हिरासतमा राखेको थियो भने अनुसन्धानका क्रममा ७ दिन हिरासतमा राखी २ लाख रुपैयाँ धरैटीमा रिहा गरेको थियो । कृषकसँग मलबापत लिएको बढी मूल्य लामाले सम्बन्धित कृषकलाई नै फिर्ता गरिसकेकाले उनको गोदाममा लागेको ताल खुलेको जिल्ला प्रशासन कार्यालय स्रोतले बताएको छ ।
यो पनि पढ्नुहोस्..
