फागुन १२, रामेछाप ।
रामेछाप जिल्लाका स्थानीय तहहरु मन्थली नगरपालिका, सुनापति, दोरम्बा र उमाकुण्ड गाउँपालिकाद्वारा संयुक्त रुपमा आयोजित तथा हेल्भेटास नेपाल र सामी परियाेजनाद्वारा सञ्चालित् सुरक्षित बैदेशिक रोजगारीका लागि पत्रकारहरुको भूमिका विषयक अन्तक्र्रिया कार्यक्रम यतिबेला मन्थलीमा चलिरहेको छ । मन्थलीमा रहेको जि.एस. होटलको सभाहलमा भइरहेको उक्त कार्यक्रममा जिल्लाका धेरैजसो संचारमाध्यम र तिनमा कार्यरत पत्रकारहरुको उल्लेख्य सहभागिता रहेको छ । कार्यक्रमको औपचारिक उद्घाटन सत्र समापन भएको छ । उद्घाटन सत्रको सभाध्यक्षताको आसनग्रहण मन्थली नगरपालिकाका नगर प्रमुख रमेशकुमार बस्नेतले गरेका थिए भने उपस्थित पत्रकार लक्षित स्वागत मन्तव्य मन्थली नगरपालिकाका उपसचिव (प्राविधिक) तथा महाशाखा प्रमुख हेमन्तकुमार बुढाथोकीले गरेका थिए ।
उद्घाटनसत्रको समापनको अवसरमा मन्तव्य राख्दै कार्यक्रमका सभाध्यक्ष बस्नेतले रामेछापका युवाहरुले आफू र आफ्नो समुदायमा आफूलाई उपयुक्त हुने स्वरोजगारमुखी कार्यक्रममा सहभागी नभई विदेश जानु नै आफ्नो विकल्प देखेको बताउँदै सभाध्यक्ष बस्नेतले अगाडि भने, ‘विकल्पहीन अवस्थामा रहेका रामेछापका युवाहरुलाई धेरै सूचनाको स्रोत बोकेका रामेछापका पत्रकार मित्रहरुले कुनै न कुनै विकल्प देखाइदिने आषयले समाचार संप्रेषण गर्ने कार्यमा लागिदिनु हुनेछ भन्ने हामी अपेक्षा गर्दछौं ।’
कार्यक्रममा स्वागत मन्तव्यलाई उठाउँदै नगरपालिकाका उपसचिव तथा महाशाखा प्रमुख बुढाथोकीले समेत सुरक्षित बैदेशिक रोजगारीका लागि पत्रकारहरुले महत्वपूर्ण भूमिका निर्वाह गरिदिने बारेमा नगरपालिकाले राम्रो अपेक्षा राखेको बताएका छन् । पत्रकारहरु नै सूचनाको प्रमुख श्रोत रहेकोले पत्रकारहरुले नै प्रत्यक्ष–परोक्ष रुपमा परामर्शकर्ताको भूमिका खेल्नुपर्ने बुढाथोकीको कथन थियो ।
हाल यो समाचार तयार पार्दसम्म अन्तक्र्रिया कार्यक्रममा कार्यक्रम संयोजक भोजराज सुनुवारले बैदेशिक रोजगारीको अवस्था र चुनौति विषयक प्रस्तुति दिइरहेका छन् ।
