चैत्र २१, जनता भ्वाइस संवाददाता, रामेछाप
महिला स्वास्थ्य सम्बन्धी १ दिने अनुशिक्षण कार्यक्रम आज मन्थलीमा सम्पन्न भएको छ । मन्थलीस्थिच नेपाल मगर महिला संघको सभाहलमा भएको कार्यक्रममा ३४ जना महिलाहरुको सहभागीता रहेको थियो ।
शुभजीवन हस्पिटल खुर्कोटको समन्वय तथा नेपाल महिला मगर संघ, रामेछाप र त्रिनेत्र अध्यात्म चिन्तन केन्द्र, रामेछापको संयुक्त आयोजनामा भएको उक्त कार्यक्रममा मनोसामाजिक परामर्श तथा महिला स्वास्थ्यको विषयमा जानकारी गराइएको थियो ।
प्रशिक्षक तथा शुभजीवन हस्पिटलका वरिष्ठ स्त्रीरोग विशेषज्ञ डा. राजन न्यौपानेले महिलाहरुले आफूमा देखा पर्ने स्वास्थ्य समस्या खुलेर अस्पतालसम्म ल्याउन नसक्दा रोग पालेर बस्नुपर्ने बाध्यता रहेको बताएका छन् ।
‘हाम्रो समाजमा अmभै महिलाहरुले लाज र सामाजिक डरका कारण आफूमा रहेको रोग पालेर बस्नु परेको छ’ जनता भ्वाइससँग कुराकानी गर्दै डा. न्यौपानेले भने, ‘आफूलाई यस्तो समस्या भएको छ भनेर अस्पतालमा आएर निर्धक्क बताउन सक्ने वातावरण बन्न सकेको छैन । सोही प्रकृतिको लाज र डरलाई पन्छाएर निर्धक्क सँग आफ्नो रोग खुलाउन सजिलो होस् भनेर हामीले यस्ता कार्यक्रमहरु गर्दै आएका छौँ ।’
आजको कार्यक्रममा सहभागी भएका महिलाले अब आफ्नो र समाजमा भएका अरु महिलामा देखिने स्वास्थ्य समस्याहरु अस्पतालसम्म ल्याउन सहयोग गर्ने उनको विश्वास छ ।
कार्यक्रममा सहभागी अञ्जना राना मगरले महिलाले आफूमा देखिने शारीरिक समस्याहरु लाज र समाजको डरका कारण भित्रै राखेर रोग पालेर बस्नु हुँदैन भन्ने शिक्षा आफूले पाएको बताईन् ।
‘मेरो समाजमा पनि धेरै महिला दिदी बहिनीहरु आफूमा रोग पालेर बसेका छन् । अब तिनीहरुको पहिचान गरेर अस्पतालसम्म पुर्याउने कुरामा म भूमिका खेल्छु’ उनले भनिन्, ‘रोग पालेर बस्ने दिनहरु अब सकिएछन् । खुलेरै आफ्नो स्वास्थ्य समस्या डाक्टरको अघि बताउन गाउँमा उत्प्रेरणा जगाउँछु ।’
गाउँमा भएका महिला दिदी बहिनीहरुमा आउने विभिन्नखाले नैराश्यता, चिन्ता र त्यसको निदानका बारेमा किशोरकुमार थापाले प्रशिक्षण दिएका थिए ।
दोलखा, रामेछाप, सिन्धुली, ओखलढुङ, खोटाङलगायत जिल्लाको केन्द्रका रुपमा रहेको खुर्कोटस्थित शुभजीवन अस्पतालले महिला स्वस्थ्य तथा प्रसूती र अन्य विविध स्वास्थ्य सेवा प्रदान गरिरहेको छ । आफूहरुले भोलिका दिनमा सेवाग्राही लक्षित विभिन्न सेवा सुविधा थप गर्ने हस्पिटलकी प्रमुख व्यवस्थापक अमृता पौडेलले बताईन् ।
आयोजक संस्था त्रिनेत्र अध्यात्मक चिन्तन केन्द्र, जिल्ला समिति रामेछापका अनुसार प्रशिक्षणमा सहभागीले केही मात्रामा भएपनि मानसिक बोझ हलुङ्गो भएको महसुस गरेका छन् ।
