निर्माण ब्यवसायिले कमजोर संरचना निर्माण गरेको कारण सडक भत्किएको स्थानीयको आरोप
कुमार श्रेष्ठ
रामेछापको मन्थली नगरपालिका वडा नं. ८ को जखनिटारमा बस्ती मुनीबाट निर्माण गरिएको सडक पहिरिएपछि स्थानीय त्रसित भएका छन् । कालोपत्रे भएको १ महिना पनि नबित्दै सडकमा पहिरो गएपछि स्थानीय त्रसित भएका हुन् ।
रामेछापको मन्थली नगरपालिका वडा नं. ८ जखनिटारमा बस्ती मुनीबाट निर्माण गरिएको कालोपत्रे सडकमा पहिरो गएपछि बस्ती समेत जोखिममा परेको भन्दै स्थानीयबासी त्रसित भएका छन् । सडकमा पहिरो गएपछि सडक छेउमा घर भएका पाँच परिवारका मानिस घर छोडेर आफन्तमा गई बसेका छन् । स्थानीयको घरको समेत संरक्षण हुने गरि सडक तत्कालै निर्माण गरिदिन स्थानीय सारदा श्रेष्ठले सम्बन्धित पक्षसँग माग गरेका छन् ।
मन्थली– गेलु सडक खण्ड अन्तर्गत जखनिटारस्थित सडकको डिलपटीको भागमा लगाइएको मेशिनरी पर्खाल भत्किनुका साथै सडकको बीचभागसम्म पहिरो गएको छ । निर्माण ब्यवसायिले कमजोर संरचना निर्माण गरेको कारण सडक भत्किएको स्थानीयको आरोप छ । जखनिटारको बस्तीमुनी सडक पहिरो जानुका साथै सडकको ठाउँठाउँमा भासिने र चर्किने भएको छ । सडक निर्माणको क्रममा स्थानीयबासीले निर्माण कार्य गुणस्तरहिन भएको भनि विरोध गर्दा समेत निर्माण ब्यवसायिले बेवास्ता गरेको कारण कालोपत्रे भएको १ महिना पनि नवित्दै सडक भत्किएको स्थानीय यसोदा माझीको भनाई छ ।
सडक भत्किदा सिंचाई कुलोमा समेत क्षति पुगेको छ । धान रोप्ने बेलामा सडकमा पहिरो गएर सिंचाई कुलो अवरुद्ध हुदा ३ सय रोपनी भन्दा बढी खेतको रोपाई समेत प्रभावित भएको मन्थली नगरपालिका कार्यपालिका सदस्य गणेश बहादुर माझी बताउँछन् ।
सडकले पुरिएको सिंचाई कुलो तत्कालै सुचारु गराउने मन्थली नगरपालिकाले जनाएको छ । पहिरो गएको सकड तथा सडक सुरक्षाको लागि लगाइएको मेशिनरी पर्खा तत्कालै सम्बन्धित निर्माण ब्यवसायिलाई निर्माण गर्न लगाउने पनि मन्थली नगरपालिकाका प्रमुख प्रशासकीय अधिकृत लिलाराज पौडेलले बताए ।
मन्थली– गेलु सडक खण्ड अन्तर्गत चालू आर्थिक वर्षमा लुमिनस कन्स्टक्सनले ९ सय मिटर सडक कालोपात्रे गरेको थियो भने नौलो सफल बिहानी निर्माण सेवाले मेशिनरी पर्खाल निर्माण गरेको थियो ।
