रामेछाप । रामेछाप नगरपालिकाले खरिद गरेर दिएको एम्वुलेन्स गाउँमा पुगेपछि वडाबासीमा खुशियाली छाएको छ । वडामा एम्वुलेन्स नहुँदा विरामी भएका नागरिकहरुले उपचारको लागि अस्पताल जान समस्या झेल्दै आएका थिए ।
रामेछाप नगरपालिकाले भन्सार छुट सहित २१ लाख ७५ हजार ६ सय ६२ रुपैयाँ रकम खर्चेर मंगलबार वडा नं १ गोठगाउँ र वडा नं ५ रामपुरका लागि एम्बुलेन्स हस्तान्तरण गरेको हो । नागरिकहरुले अव बिरामी पर्दा उपचारको लागि अस्पतालसम्म सहजै जान पाउने भएका छन् ।
उक्त एम्वुलेन्सको साँचो रामेछाप नगरपालिकाका प्रमुख नरवहादुर थापामगर र उप–प्रमुख सृजना खड्काले सयुक्तरुपमा वडा नं १ का वडा अध्यक्ष नरवहादुर थापामगर र वडा नं ५ का वडा अध्यक्ष भिमवहादुर तामाङ्गलाई हस्तान्तरण गरेका हुन् ।
वडा कार्यालयमा एम्वुलेन्स नहुँदा गाउँमा विरामी परेको बेला, भाडाका सवारीसाधनमा वा बोकेकै भरमा विरामीलाई अस्पतालसम्म लैजानु पर्ने वाध्यता बाट मुक्ती मिलेको वडा नं ५ का वडा अध्यक्ष भिमवहादुर तामाङ्गले बताए ।
गाउँमा गम्भिर प्रकृतिका विरामी भएमा ती विरामीको उपचारको लागि अस्पतालसम्म लैजान यसअघि डोको, ओलिनकाठको प्रयोग गरिदै आएका थियो । पछि गाउँमा सडक संचालनमा आएपछि महङ्गो मूल्य तिरेर भाडाका गाडिमा विरामीलाई अस्पतालसम्म लैजानु पर्ने वाध्यता थियो । बिरामीका आफन्तले पैसा तिर्छु भन्दा पनि भनेको समयमा यातायातका साधनहरु गाउँमा पाउन नसक्दा उपचार बिना नै अकालमा धेरै नागरिकहरुले ज्यान गुमाउनु परेको पिडावाट अब मुक्ती मिलेको रामेछाप नगरपालिका वडा नं १ का वडा अध्यक्ष नरवहादुर थापामगरले जानकारी दिए ।
