रामेछाप । कार्यालयमा दैनिक काम लिएर जाने सेवाग्राहीको बेवास्ता गर्दै कृषि ज्ञान केन्द्र रामेछापकी प्रमुख निर्मला गुरुङ्ग दैनिक सरकारी पोशाकमै घाम तापेर दिन कटाउने गरेकी छिन् । कार्यालय समयमा सेवा लिन आउने सेवाग्राहीको काम गर्नुपर्नेमा त्यसको वेवास्ता समेत गर्ने गरेकी छिन् ।
कार्यालयमा पुगेका सेवाग्राहीलाई वेवास्ता गर्ने र नागरिकसँग भेटघाट नगर्ने र झर्कने जस्ता कार्यहरु यसअघि पनि पटक–पटक गर्दै आएको गुनासो कार्यालयमा सेवा लिन पुगेका सेवाग्राहीले गर्दै आएका थिए । प्रमुख गुरुङ्ग दैनिक रुपमा घाम तापेर बस्ने र सेवाग्राहीको गुनासो समेत नसुन्ने गरेको सेवा लिन पुगेका सेवाग्राहीहरु बताउँछन् ।
कृषि ज्ञान केन्द्रको कार्यालयमा वुधवार प्रमुख गुरुङ्ग सँग परामर्श लिन पुगेका रामेछाप नगरपालिका वडा नं २ देउरालीका कृषकहरु प्रमुखले नभेटेपछि त्यतिकै घर फर्किएका छन् । कार्यालय परिसरवाट बाहिरिदै गरेका कृषकहरुले आफुहरु धानवाली, तरकारी लगाएतका वालीहरुमा लागेको रोग र त्यसको निधानको बिषयमा जानकारी लिन आउँदा प्रमुख गुरुङ्गले भेट नै नदिई बरण्डामा घाम तापेर बसेकाले आफुहरु विना परामर्श खाली हात फर्किएको रामेछाप नगरपालिका वडा नं २ देउरालीका अशोक मगरले जानकारी दिए ।
उनले भने– कृषि ज्ञान केन्द्रले सिफारिस गरेको धान खरिद गरेर लगेको धानको बीउँ खेतमा लगाउँदा धानको वाला मात्रै भएको र दाना नै लागेन । यता खेत तथा वारीमा लगाइएको तरकारीमा रोगले क्षती पुगेपछि सरकारी अनुदान मिल्छ की मिल्दैन भन्ने बिषयमा प्रमुखलाई नै भेटेर कुराकानी गर्न आएका थियौ । प्रमुख गुरुङ्गले हामी किसानहरुलाई भेट नै नदिई घाम तापेर बसेपछि आफुहरु त्यतीकै फर्किएको कृषक मगरले गुनासो गरे ।
कृषकहरु कार्यालयबाट बाहिरिएसँगै उक्त कार्यालयमा भएगरेका कामहरुको सूचना लिन पुुगेका संचारकर्मीहरु पुग्दा पनि प्रमुख गुरुङ्ग घाम नै तापेर बसेकी थिइन । संचारकर्मीहरुले केही सूचना आवश्यक परेकाले भेट गर्न आएको भन्दा उनले आफु एकछिन घाम तापेर बस्ने भन्दै कार्यकक्षमा समेत पस्न नमानेको मेरो प्रदेशका प्रधान सम्पादक दीपक भट्टले जानकारी दिए ।
उनले भने– नागरिकले तिरको करको पैसाले तलव भत्ता खाएर नागरिकहरुको काम नै नगरि दैनिक घाम तापेर बस्न प्रमुख गुरुङ्गलाई लाज लाग्नुपर्ने हो । यता जिल्लाका सरकारी कार्यालयको नियमित अनुगमन गर्ने तालुके अड्डा जिल्ला प्रशासन कार्यालयले पनि सरकारी कार्यालयको नियमित अनुमगन गर्न नसक्दा कार्यालय प्रमुखहरु र कर्मचारीहरुको ज्यादती बढ्दै गएको भट्टले बताए ।
कार्यालयमा सेवा लिन पुगेका सेवाग्राहीको काम नै नगरि कार्यालय प्रमुख दैनिक घाम तापेर बस्नु नितान्त घृणित काम भएको नागरिक समाजका अगुवा हिमाल ढुंगेलले जानकारी दिए । उनले भने– एउटा सरकारी कार्यालयको प्रमुख सेवाग्राहीको काम रोकेर घाम तापेर बस्नु भनेको रामेछापका आम नागरिकहरु माथि गरेको अपराध हो । यसबिषयमा नागरिकहरुले खबरदारी गर्नुपर्ने र तालुके सरकारी कार्यालयले आवश्यक कारवाही गर्नुपर्ने ढुंगेलले बताए ।
