रामेछाप । एघार हजार पूँजीबाट सुरु भएको एक सहकारी हाल अर्बौ पुँजीको भएको छ । तामाकोसी सेवा समितिका ११ जना कर्मचारी एवम् स्वयमसेवकहरूले एक–एक हजार उठाएर सुरु गरेको मन्थली बचत तथा ऋण सहकारी संस्थाको पूँजी १ अर्ब नाघेको संस्थाको २४ औँ साधारण सभामा संस्थाका अध्यक्ष ध्रुब प्रसाद सुवेदीले बताए ।
असार मसान्त सम्मको उक्त सहकारीको कुल पुँजी ९८ करोड ७७ लाख ३९ हजार ३ सय ६० थियो । संस्थाले गत आर्थिक वर्षमा ५८ लाख १४ हजार ८ सय ६२ रुपैया नाफा कमाएको संस्थाका कोषाध्यक्ष टिका भट्ट बताउँछन् ।
मन्थली वचतले तामाकोशी सेवा समिति सँग मिलेर तामाकोशी सहकारी अस्पताल समेत चलाएको छ । मन्थली बचतले सोही अस्पताल मार्फत आफ्ना सेयर सदस्यहरूलाई उपचार शुल्कमा १५ प्रतिशत छुट साथै सदस्य मृत्यु राहत समेत उपलब्ध गराउँदै आएको छ ।हाल सहकारीले एम्बुलेन्स खर्चमा छुट दिँदै आएको र अब सहकारी आफैले छिट्टै एम्बुलेन्स सेवा संचालन गर्ने संस्थाका सचिव गोविन्द प्रसाद घिमिरेले बताए ।
जिल्लाको पहिलो नंबरको यस सहकारीमा १४ हजार भन्दा बढि शेयर सदस्यहरू छन् । मन्थली नगरपालिकाको १४ वटै वडा, रामेछाप नगरपालिकाको ४ वडा, लिखुतामाकोशी गाउँपालिकाको ४ वडा र खाँडादेवी गाउँपालिका २ वडा यस संस्थाको कार्यक्षेत्र रहेको छ । साहित्यकार स्व.जगदिश घिमिरेको तामाकोशी सेवा समिति जन्माउने परिकल्पना सफल भए पश्चात मन्थली वचत तथा ऋण सहकारी संस्था लि.को जन्म भएको हो । २०५० सालमा अनौपचारिक वचत समुह गठन भए पनि २०५४ साल देखि मन्थली बचत तथा ऋण सहकारी संस्था दर्ता भई सञ्चालनमा आएको हो ।
