रामेछापको मन्थली नगरपालिकाका नगरप्रमुख रमेश कुमार वस्नेतले निजी क्षेत्र र सहकारीहरुले उत्पादनका क्षेत्रमा लगानी बढाउनुपर्नेमा जोड दिएका छन् । मन्थल वचत तथा ऋण सहकारी संस्थाको २४औँ वार्षिक साधारण सभालाई सम्बोधन गर्दैै नगर प्रमुख वस्नेतले नगरको समृद्धि चाहने हो भने सहकारी र नीजि क्षेत्रहरुले उत्पादकत्व क्षेत्रको लगानीमा जोड दिनुपर्ने बताए । खाद्यन्न तथा तरकारीमा मात्रै आत्मा निर्भर बन्न सके पनि नगरको समृद्धि धेरै सहयोग पुग्ने उनले बताए । त्यसका लागि कृषि र सहकारीहरुले कृषि उपज र पशु उत्पादनमा जोड दिनुपर्ने उनको भनाई छ ।
यदि त्यसो हुन सकेन भने हामीले लिएको नीतिले मात्रै विकास र समृद्धि हासिल गर्न नसकिने नगर प्रमुख वस्नेतले बताए । राज्यको तीन खम्बे अर्थ नीति अन्तर्गतका सरकार, नीजि क्षेत्र र सहकारीको योगदान विना मुलुकको समृद्धि र विकास हुनै नसक्ने उनले बताए ।
अहिले मन्थली नगरपालिकामा कुल १०९ वटा सहकारी संस्थाहरु रहेकोमा ५३ वटा मात्रै नगरपालिकामा सूचीकृत भएको नगर प्रमुख वस्नेतले बताए । नगरको शिक्षा सुधार गर्न सके नगरको विकास र समृद्धिमा थप सहयोग पुग्ने समेत उनले बताए । राजधानी र तराई क्षेत्रको नजिक पर्ने मन्थली नगरपालिका पहाडी जिल्लाका नागरिकहरु समेत यस नगरपालिका भएर आवत जावत गर्ने भएकोले नगरभित्रको शिक्षामा सुधार गर्न सके अन्य जिल्लाका मानिसहरुको समेत बसाबास हुने भएकोले विकास र समृद्धिमा थप टेवा पुग्ने उनले विश्वास व्यक्त गरे । नगरपालिका कृषियोग्य जमिनमा घर, आवास बनाउन नदिने गरी भू–उपयोग नीति पनि चाँडै ल्याउन लागेको वस्नेतले बताए । नगरको आगामी हिउँदे अधिवेशन मार्फत उक्त नीति ल्याइने उनले बताए ।
निजी क्षेत्र र सहकारीहरुले उत्पादनका क्षेत्रमा लगानी बढाउनुपर्छः नगर प्रमुख वस्नेत
