काठमाडौं । सत्ता गठबन्धन दलकै जनवर्गीय संगठन एमसिसीको विरोधमा सडकमा उत्रिएका छन्। आज दिउँसो १ बजे बस्ने प्रतिनिधिसभा बैठकमा एमसिसी टेबल गर्ने तयारी गरिरहेका बेला सत्तारुढ नेकपा माओवादी केन्द्र र एकीकृत समाजवादीका जनवर्गीय संगठनले आन्दोलन घोषणा गरेका हुन्।
‘यथास्थितिमा एमसिसी टेबल गर्ने कदमविरुद्ध’ माओवादी केन्द्र निकट अनेरास्ववियु (क्रान्तिकारी) र वाइसियलले संसद भवन बानेश्वर घेराउ गर्ने भएका छन्। अनेरास्ववियुका नेताहरुका अनुसार बिहान ११ बजे बानेश्वरस्थित एभरेस्ट होटल अगाडि भेला भएर संसद भवनसम्म प्रदर्शन गरिने भएको छ।
त्यस्तै एकीकृत समाजवादी निकट विद्यार्थी संगठन अनेरास्ववियुले पनि एमसिसीविरुद्ध संसद भवन घेराउ गर्ने भएको छ । त्यस्तै राप्रपाका भ्रातृ संगठनहरुलेले पनि दिउँसो १२ः ३० बजे बबरमहलदेखि संसद भवनसम्म विरोध प्रदर्शन गर्ने कार्यक्रम छ।
