रामेछाप । जिल्लाको विभिन्न स्थानमा चोरीका घटना बढ्न थालेपछि जिल्ला प्रहरी कार्यालय रामेछापले ठूलो संख्यामा प्रहरी परिचालन गरेको छ । केही दिन यता जिल्लाका विभिन्न स्थानमा दैनिक रूपमा चोरी घट्ना बढेपछि जिल्ला प्रहरी कार्यालयले ठूलो सङ्ख्यामाप ्रहरी परिचालन गरेको हो । घट्ना नियन्त्रण गर्ने उद्देश्यले सीमानाकामा प्रहरीले सुरक्षा सर्तकासमेत बढाएको छ । प्रहरीले रामेछाप प्रवेश गर्ने नाकानाकामा चेक जाँचलाई कडाई गरेको छ ।
चोरीको घटना दिनदिनै बढेपछि अनुसन्धानमा जिल्ला प्रहरी कार्यालय रामेछापका प्रमुख राजकुमार थिङ आफै गाउँगाउँमा गएर घट्नाको अनुसन्धानमा जुटेका छन् । रातको समयमा सडक आसपासको क्षेत्रमा चोरीको घटना बढेसँगै स्थानीयहरू पनि समूहबद्ध भएर चोरीमा संलग्नको खोजीमा जुटन सुरु गरेका छन् ।
दुई दिनकै अवधिमा जिल्लाको गोकुलगंगा गाउँपालिका र मन्थली नगरपालिकामा गरी झन्डै दुई दर्जन भन्दा बढी स्थानमा चोरी गरेर लाखौका धनमाल लगिएको छ । मन्थली नगरपालिकाका, गोकुलगंगा गाउँपालिकामा गरी १३ स्थानमा चोरी भएको जिल्ला प्रहरी कार्यालय रामेछापले जनाएको छ । प्रहरीका अनुसार मुख्य सडक आसपासका पसल, सहकारी संस्था तथा व्यक्तिका घरहरुमा चोरीको घटना केन्द्रीत छ । प्रहरीकाअ नुसार चोरहरुले पन्जा तथा मास्क प्रयोग गरेकाले पत्ता लगाउन कठिन भएको छ ।
डिएसपी थिङले चोरीका घटनामा संलग्नहरूको खोजीकार्यलाई तीव्रता दिएको बताएका छन् । प्रहरीले योजनाबद्ध रूपमा चोरीमा एउटै समूहको हातहुन सक्ने अनुमान गरेको छ । विगतमा पनि मन्थली नगरपालिका र गोकुलगंगा गाउँपालिका विभिन्न ठाउँमा चोरीमा संलग्न व्यक्तिहरुलाई प्रहरीले लामो समयको अनुसन्धानपछि पक्राउ गरेको थियो । प्रहरीले स्थानीय सरकारसँग समन्वय गरेर मुख्य नाकाहरुमा सिसी क्यामेरा जडान गर्नुपर्नेमा जोड दिएको छ । प्रहरीले सेलेघाट नाका, साँघुटार नाका लगायतको ठाउँमा सुरक्षा निगरानी बढाएको छ ।
