काठमाडौं – राष्ट्रपति शैक्षिक सुधार कार्यक्रम अन्तर्गत ‘पढ्दै कमाउँदै’ कार्यक्रमका लागि रामेछाप जिल्लाको २ विद्यालय छनौट भएका छन् । सो कार्यक्रममा उमाकुण्ड गाउँपालिका वडा नं. २ को सिद्देश्वर मावि र खाँडादेवी गाउँपालिकाको श्री माध्यमिक विद्यालय राकाथुम छनौटमा परेका छन् । उक्त कार्यक्रमका लागि देश भरबाट१४० विद्यालय छनोट गरिएको छ ।
शिक्षा मन्त्रालयले देशभरका स्थानीय तहमार्फत सामुदायिक विद्यालयसँग प्रस्ताव मागेको थियो । सो बाट प्राप्त प्रस्तावको आधारमा यही चैत ८ को निर्देशक समितिको बैठकले ती विद्यालय छनोट गरेको शिक्षा तथा मानव स्रोत विकास केन्द्रका निर्देशक सुरेशकुमार जोशीले जानकारी दिए ।
नेपाली कांग्रेसका सभापति शेरबहादुर देउवा नेतृत्वको सरकारले पूरक बजेटमार्फत शिक्षालाई सीपसँग जोड्न ‘पढ्दै कमाउँदै’ कार्यक्रम ल्याएको थियो । यस कार्यक्रममा प्राविधिक धारको कक्षा सञ्चालन भएका विद्यालयलाई प्राथमिकता दिइएको छ ।
छनोट भएका विद्यालयलाई सरकारले अनुदान दिनेछ । सोही अनुदान रकमका आधारमा विद्यार्थीलाई पढ्दै, कमाउँदै अभियानमा सामेल गराइनेछ ।
