रामेछाप । माथिल्लो तामाकोशी जलविद्युत् आयोजनाको कारण तामाकोशी नदीको किनारमा लास जलाउन समस्या भएको छ । जलविधुत आयोजनाले दिनभर जम्मा गरेर राखेको पानी बेलुकी पख खोलेपछि रातको समयमा लास जलाउन समस्या भएको हो ।
रातको समयमा लास जलाउँदा रामेछापको मन्थलीमा रहेको रणजोर खोलाको दोभानबाट मात्र आधादर्जन भन्दा बढी लास बगाई सकेको छ । जलविद्युत आयोजनाले बिना सूचना ड्याममा पानी खोल्ने र बन्द गर्ने गर्दा समस्या देखिएको छ । ड्याममा पानी जम्मा गर्दा नदीको सतह घट्ने र बन्द गर्दा पानीको सतह बढ्ने भएकोले लास जलाउन समस्या भएकोे हो ।
जलविद्युतले विद्युत आयोजनाले बेलुकी पख पानी खोल्दा नदी किनारमा खेल्न जाने बालबालिका बग्ने त्रासले स्थानीय भयभीत हुन थालेका छन् । आयोजनाले नदीमा अप्रत्याशित रुपमा बाढी आउनेबारे सूचना सर्वसाधारणलाई दिने गरेको छैन । बाढीका कारण तामाकोसी किनारमा लाश जलाउनसमेत कठिनाइ हुन थालेको स्थानीय मनबहादुर कार्कीले बताउनुभयो ।
बढी बिजुली चाहिँदा माथिल्लो तामाकोशीले आफ्नो छुट्टै जलाशय खोल्ने गरेको छ । बिहान र बेलुका प्राधिकरणलाई बढी बिजुली आवश्यक पर्छ । माथिल्लो तामाकोशी जलविद्युत् आयोजनाका प्रवक्ता मित्र मणी पोखरेलका अनुसार आयोजनाको जलाशयमा जम्मा भएको पानी विद्युत् उत्पादनका लागि खोल्दा जलाशय बढीमा ५ मिटरसम्मको पानी घट्ने गरेको छ । ५ मिटर जलाशयको पानी घट्नु भनेको तामाकोशीमा हुने जलप्रवाहमा पानीको मात्रा अस्वभाविक बढ्नु हो । माथिल्लो तामाकोशीले बढी बिजुली चाहिँदा आयोजनाको जलाशय खोल्ने गरेको छ ।
बिहान र बेलुका प्राधिकरणलाई बढी बिजुली आवश्यक पर्छ । त्यसबेला प्राधिकरणको भारप्रेषण केन्द्रको निर्देशन र मागबमोजिम जलाशयको पानी खोलेर बिजुली उत्पादन गर्ने गरेको माथिल्लो तामाकोशी जलविद्युत् आयोजनाका प्रवक्ता पोखरेलले बताएका छन् ।
केन्द्रले ४ सय ५६ मेघावाट माग्दा जलाशयको पानी प्रयोग हुने भएकाले त्यसबेला तामाकोशीमा पानीको बहाव बढ्ने पोखरेलले जानकारी दिए । समुद्री सतहबाट १ हजार ९ सय ८२ मिटरको उचाइमा रहेको आयोजनाको २२ मिटर लामो बाँधमा १ हजार ९ सय ८७ मिटर उचाइसम्म पानी जम्मा गर्ने गरिएको छ । संकटका बेला त्यहि पानी खोलेर उत्पादनलाई पूर्ण क्षमता दिइने गरिएको छ ।
आयोजनाभन्दा तल दोलखा र रामेछाप जिल्लाका नदी किनारमा बसोबास गर्ने सर्वसाधारण; माछा मार्ने, नुहाउन जाने र शव जलाउन जानेहरू बाढीका कारण प्रभावित हुन थालेको जानकारी आफूले पहिलो पटक पाएको पोखरेलले बताएका छन् । तर लास जलाउन समस्या भएको बारे आपूmलाई जानकारी नभएको बताए नदीमा आउन सक्ने बाढीका बारेमा सार्वजनिक सूचनासमेत जारी गर्नुपर्ने अवस्था देखिएको पोखरेलले बताए ।
