मन्थली नगरपालिकाको नीति तथा कार्यक्रम र बजेट सार्वजनिक


रामेछाप । मन्थली नगरपालिकाले आगामी आर्थिक वर्ष २०७९/८० को नीति तथा कार्यक्रम र बजेट सार्वजनिक गरेको छ । नगरपालिकाले आगामी वर्षका लागि एक अर्ब ४० करोड ७८ लाखको बजेट सार्वजनिक गरेको छ ।

नगरपालिकाले स्वास्थ्य, शिक्षा,कृषि तथा पशुपालन, विपद् व्यवस्थापन, लक्षित वर्ग कार्यक्रम, रोजगारी सिर्जना र सुशासनलाई मुख्य प्राथमिकतामा राखेर नीति तथा कार्यक्रम सार्वजनिक गरेको छ।

शुक्रबार नगरसभाको ११ औँ नगर अधिवेशनमा नगरप्रमुख लब श्रेष्ठले सार्वजनिक गरेको नीति तथा कार्यक्रममा एक वडा एक उत्पादन, विद्यालयमा सिक्दै कमाउदै र वडा स्तरबाट नै अनलाइन प्रविधिबाट व्यक्तिगत घटना दर्ताको व्यवस्था गरिने लगायतका कार्यक्रम समावेश गरिएको छ ।

एकीकृत सम्पत्ती करमा १० प्रतिशत कटौती गरी कर समायोजन गर्ने, नगरभित्र नै कृषि तथा पशु प्राविधिक जनशक्ति उत्पादन तथा परिचालनका लागि कृषि र भेटेरिनरी बिषयमा (डिप्लोमा) अध्ययनका लागि छात्रवृत्ति कार्यक्रम सञ्चालन गर्ने, नगरपालिका भित्रका विद्यालयहरुमा कक्षा एक देखि नै गणित लगायतका प्रमुख बिषय अङ्ग्रेजी माध्यमबाट पठनपाठन गर्ने, विद्यार्थीसँग स्वास्थ्यकर्मी र किशोरीसँग नर्स कार्यक्रम सञ्चालन गर्ने लगायतका कार्यक्रम समावेश गरिएको छ ।

नगरसभामा मन्थली नगरकी उपप्रमुख इश्वरी बस्नेतले एक अर्ब ४० करोड ७८ लाख ५३ हजार रुपियाँको बजेट प्रस्तुत गर्नुभएको छ । विनियोजित बजेटमध्ये चालुतर्फ ९६ करोड २७ लाख ३ हजार र पूँजीगत तर्फ ४४ करोड ५१ लाख ५० हजार रुपियाँ रहेको छ । बाँडफाँड गर्न मिल्ने ५६ करोड ८ लाख ११ हजार रकम विनियोजन गरिएकोमा चालुतर्फ २६ करोड २८ लाख ७१ हजार र पूँजीगततर्फ ३० करोड ५ लाख ५१ हजार रहेको छ ।

तपाईको प्रतिकृया दिनुहोस्