माधव नेपालको कडा निर्देशन– ओलिलाई मुखभरिको जवाफ दिनोस्, राम्रो कुरा नगर्नोस्,


काठमाडौं । नेकपा एकीकृत समाजवादीका अध्यक्ष माधवकुमार नेपालले नेकपा एमालेका अध्यक्ष केपी शर्मा ओलीबारे सकारात्मक कुरा गर्दै नगर्न पार्टीका नेता–कार्यकर्तालाई कडा निर्देशन दिएका छन् ।

शनिबार काठमाडौंमा आयोजित पार्टीको उपत्यका विशेष युवा जिल्ला भेलामा उनले ओलीबारे सकारात्मक हुने खालको कुनै पनि प्रचार नगर्न पार्टीपंक्तिलाई सचेत गराएका हुन् । ओलीबारे ‘पोजिटिभ’ हुने गरी प्रचार गरिए सैह्य नहुने उनको चेतावनी थियो ।

अध्यक्ष नेपालले ‘हामीलाई अपराधी घोषणा गर्ने, देशद्रोही भन्ने, अस्तित्वलाई समेत स्वीकार नगर्ने ओलीलाई मुखभरिको जवाफ दिन’ पार्टीका नेता–कार्यकर्तालाई सक्रिय हुन निर्देशन समेत दिए । उनले एमालेसँग मिल्न जाने कल्पना समेत गर्न नसकिने पटक–पटक दोहोर्‍याए ।

विचार मिल्ने, कुरा मिल्ने वामपन्थी दलहरूसँग एकताबद्ध भएर जाने प्रस्ताव आफ्नो पार्टीले अगाडि बढाइरहेको भन्दै उनले एमालेसँग भने मिल्ने कुनै सम्भावना नभएको बताए ।

“।।।हामीसँग कुरा मिल्ने, विचार मिल्नेहरूसँग एकताबद्ध हुनका लागि हामीले हात अगाडि बढाएका छौँ । हामी अरूसँग विलीन हुने होइन । हाम्रो विरोधीहरूले कुप्रचार गरिरहेका छन्, एमालेमा विलीन हुने भनेर । त्यसमा कुनै सत्यता छैन । हाम्रो पार्टी विचारको आधारमा उभिएको छ । हाम्रो पार्टी आदर्शको आधारमा उभिएको छ,” उनले भने, “त्यसो हुनाले एमालेले जेसुकै बोलोस् । त्यसका नेताहरूले हामीलाई जथाभावी आरोप लगाऊन्, त्यसको हामीले जवाफ दिन सक्नुपर्दछ । झुटको पुलिन्दा बाँडिरहेका छन् । जनतामा भ्रम फैल्याउने कोसिस गरिरहेका छन् । त्यो भ्रमलाई चिर्नुपर्छ हामीले । उनीहरूले लेख्छन् भने पनि काउन्टर जवाफ दिनुपर्छ हामीले । उनीहरूको महिमा गर्ने होइन । केपी ओलीका खुट्टा टाँसीटाँसी हिँड्ने पनि होइन । हामीलाई समाप्त पार्ने कोसिस गरेसम्म हामीले पनि उनीहरूप्रति माया, दया गरेर बस्ने पनि होइन ।”

उनले थपे, “।।।एमालेसँग जाने कल्पना नै गर्न सकिँदैन । जुन पार्टीले हाम्रो अस्तित्व स्वीकार गर्दैन, जसले हामीलाई अपराधी घोषणा गरेको छ, जसले हामीलाई देशद्रोही भनेको छ, त्यस्ता नेताप्रति कुनै किसिमले पोजिटिभ कुराको प्रचारप्रसार कसैले पनि नगर्नू होला । गर्नुहुन्छ भने कुरा बिग्रन्छ, म क्लियर गर्न चाहन्छु, त्यस्ता कुराहरूमा लाग्न जरुरी पनि छैन । बरु, खण्डन गर्ने, सिधै मुखभरिको जवाफ दिने । मुखभरिको जवाफ दिनु भएन भने रक्षात्मक भइन्छ । त्यस्ता मान्छेले केही पनि गर्न सक्दैन ।”

अध्यक्ष नेपालले पार्टी विभाजन भएको बेला गएका ‘१० भाइ’हरूको एमालेमा बिजोग भइरहेको टिप्पणी पनि गरे । एमालेमा बिजोग हुने अवस्था आउने देखेरै आफूहरूले बाध्य भएर नयाँ पार्टी गठन गर्नुपरेको उनको भनाइ थियो ।

तपाईको प्रतिकृया दिनुहोस्