रामेछाप ।सरोकारहरूको बैठकले जेठको पहिलो हप्ता देखि मन्थली-काठमाडौं उडान गर्न माग गरेका छन । प्रतिनिधि सभा सदस्य पूर्णबहादुर तामाङ (कान्छाराम) को समन्वयमा बसेको सरोकारवालाहरूको बैठकले उक्त माग गर्ने निर्णय गरेको हो ।
मन्थली विमानस्थल बैकल्पिक रुपमा मात्र प्रयोग गरिएको व्यापक जनगुनासो आए पछि मन्थली काठमाडौं उडान नियमित गर्न पहल सुरु गरिएको प्रतिनिधि सभा सदस्य कान्छारामले बताए ।
मन्थली काठमाडौ उडान सुरु गर्नका लागि स्थानीय सरकारको तर्फबाट आफू जुनसुकै सहयोग गर्न आफू तयार भएको मन्थली नगरपालिकाका नगरप्रमुख लव श्रेष्ठले बताए ।
स्थानीयको मागलाई पूरा गर्न आफू सकारात्मक रहेको हवाई सेवा निर्देशनालयका उपमहानिर्देशक प्रेमनाथ ठाकुरले बताएका छन् ।
मन्थली-लुक्ला उडान गरिरहेका एअरलाईन्सका प्रतिनिधि, वडा अध्यक्ष, मन्थली नगरपालिकाका नगरप्रमुख, समन्वय समिति प्रमुख तथा प्रतिनिधि सभा सदस्य सहित सरोकारवालाहरूको बैठकमा मन्थलीबाट काठमाडौं उडान नभए अन्य उडानलाई समेत समस्या हुन सक्ने समेत सरोकारवालाको भनाई छ ।
स्थानिय हरुले हप्तामा कम्तिमा पनि रामेछापबाट काठमाण्डौका लागि एउटा उडान राख्नका लागि अनुरोध गर्दै आएका छन्। आज सम्म रामेछापका नागरिक आसै आसमा बसेका छन् ।
रामेछाप विमानस्थलबाट ब्यवसायीक उडान गर्दै आएका निजि विमान कम्पनीहरुले रामेछाप काठमाण्डौ उडानमा यात्रु नहुने भन्दै प्राधिकरणको आँखामा छारो हाल्दै आएका छन् । स्थानीयले केहि बर्ष देखिनै रामेछाप देखि काठमाण्डौका लागि यात्रु बाहक हवाई सेवा संचालनको माग गरेपनि विमान कम्पनी र सरकारले त्यसको कुनै वास्ता गरेका छैनन् ।
पंचायतकालमा निर्माण भएको विमानस्थललाई कालो पत्रे गरेर स्तरोन्नति गरीएको भएपनि यस एरपोर्टबाट काठमाडौ उडान गरिएको छैन । तर नेपाल नागरिक उडड्यन प्राधिकरणले भने सोलुजाने पर्यटकहरुका लागि मन्थली एअरपोर्ट बाट लुक्लाका लागि जहाज उडाउँदै आएको छ । त्यस बाहेक तारा, सिता र समिट एयरले पनि पर्यटक केन्द्रीत उडान भर्दै आएको छ ।
