रामेछाप । रामेछाप जिल्ला खेलकुद विकास समितिको संयोजन तथा रामेछाप जिल्ला फुटबल सङ्घको आयोजनामा हेटौडामा हुन लागेको खेलकुद प्रतियोगितामा सहभागी खेलाडीका लागि ७ दिने बन्द प्रशिक्षण कार्यक्रम सम्पन्न गरेको छ ।
सङ्घले बिहीबार जिल्ला समन्वय समितिकी प्रमुख चिना खड्काको प्रमुख आतिथ्ययतामा खेलाडीहरूलाई सहभागी गराएर ७ दिने बन्द प्रशिक्षण कार्यक्रमको समापन सँगै खेलाडीहरूका लागि खेलकुद ड्रेस र सामाग्री समेत हस्तान्तरण गरिएको थियो । ती सामाग्री विभिन्न ब्यक्तिहरुद्धारा उपलब्ध गराइएको जानकारी पनि जिल्ला अध्यक्ष सुन्दर खड्काले गराएका थिए ।
सदरमुकाम मन्थलीका विभिन्न स्थानमा गराइएको बन्द प्रशिक्षण कार्यक्रमका खेलाडीहरूलाई नयाँ गोरखगण रामेछापका प्रशिक्षक खेलाडीहरूले प्रशिक्षण दिएका थिए । उक्त प्रशिक्षण कार्यक्रमको समापन कार्यक्रमलाई सम्बोधन गर्दे कार्यक्रमकी प्रमुख अतिथि चीना खड्काले जिल्ला फुटबल सङ्घले जिल्लाको फुटबल क्षेत्रको विकासमा पुर्याएको सहयोगको प्रशंसा गर्दे प्रशिक्षार्थी खेलाडीहरूलाई उँचो मनोबलका साथ मर्यादामा रहेर खेलमा सहभागी हुन पनि आग्रह गरिन् ।
रामेछाप जिल्ला फुटबल सङ्घका अध्यक्ष सुन्दर घिमिरेको अध्यक्षतामा भएको उक्त कार्यक्रममा नेपाल पत्रकार महासङ्घ जिल्ला शाखा रामेछापलाई सम्मान पत्रद्वारा सम्मान गरिएको थियो । कार्यक्रममा रामेछाप जिल्ला खेलकुद विकास समितिका अध्यक्ष सरोज गाहा मगर लगायत जिल्ला स्थित विभिन्न सरोकारवाला निकायका प्रतिनिधिहरूलाई समेतलाई मायाँको चिनो हस्तान्तरण गरिएको थियो ।
