रामेछाप । बागमती प्रदेशका आर्थिक मामिला तथा योजना मन्त्री बहादुर सिंह लामा समक्ष लिखु तामाकोशी गाउँपालिकाका स्थानीयले माग गरेका छन् । लिखु तामाकोशी गाउँ पालिका वडा नम्बर ७ मा अर्थमन्त्रीसँगको एक भेटकार्यक्रममा पालिका अध्यक्ष केशव महत र उपाध्यक्ष दिपा पाख्रिन सहित उपस्थित स्थानीय नेता तथा कार्यकर्ता र स्थानीयवासीले पालिका भित्र मेरुदण्ड सडकको रूपमा रहेको हलेदे–नागदह–धोबी सिरिशे सडक कालो पत्रे सहित स्तरोन्नति गर्न बजेट व्यवस्थापन गर्न माग गरेका छन् । गाउँ पुगेका प्रदेश अर्थमन्त्रीलाई स्थानीय आगुवाले पालिकाको बस्तु स्थितीका बारेमा जानकारी गराउँदै सडक र खानेपानीको विकासमा जोड दिन अनुरोध गरेका छन् ।
अर्थमन्त्री समक्ष कुरा राख्दै गाउँपालिका अध्यक्ष केशव महतले जिल्लाबाट विभिन्न कालखण्डमा जिल्लाका व्यक्ति पहुँचमा र नेतृत्वमा पुग्दा पनि लिखु तामाकोशी गाउँपालिकाको उक्त सडक अझै पनि सुधार हुन नसकेको बताए । एक प्रदेशबाट छिमेकी अर्को प्रदेश जोड्ने यो सडक पनि भएकाले यसको सुधार अनिवार्य रहेको अध्यक्ष महतले बताए । कार्यक्रम पुगेका नेपाली काङ्ग्रेस रामेछापका सभापति तथा प्रतिनिधि सभा सदस्य पूर्ण बहादुर तामाङले समेत पालिकाको बारेमा जानकारी गराउँदै सडकलाई प्राथमिकता दिएर बजेट व्यवस्थापन गर्न अर्थमन्त्री समक्ष माग गरेका छन् । उनले क्रमागत रूपमा बजेट व्यवस्थापन अर्थमन्त्री समक्ष माग गरेका छन् ।
उक्त सडक खण्डको ऐरमबास खोला देखि धोबी सम्म ढलान गर्नु पर्ने स्थिति छ सो कामका लागि करिब ६ करोड बजेट लाग्छ अर्थमन्त्री समक्ष कुरा राख्दै तामाङले भने सक्नु हुन्छ ६ करोड नै बजेट व्यवस्थापन गर्नुस् । नसके ४ करोड बजेट प्रदेश सरकारले व्यवस्थापन गरे संसद् कोषको बाटो खुल्नासाथ आफूले पनि १ करोड बजेट व्यवस्थापन गर्ने बताए । उनले प्रदेश माननीयले पनि बजेट व्यवस्थापन गर्नु पर्नेमा जोड दिएका थिए । कार्यक्रम बोल्दै अर्थमन्त्री लामाले आफूले सबैको भावना बुझेको र सकेको सहयोग गर्ने बताए ।
