रामेछाप । जिल्लाको मन्थली नगरपालिकाले २२ प्रतिशत बजेट मात्र खर्च गरेको छ । स्थानीय सञ्चित कोष व्यवस्थापन प्रणालीमा जम्मा भएको १ अर्ब १३ करोड ५ लाख ४३ हजार रुपैयाँ मध्ये पुसको तेस्रो हप्ता सम्म आईपुग्दा पुँजीगत तर्फ १२ प्रतिशत र चालु तर्फ २७ प्रतिशत बजेट खर्च भएको मन्थली नगरपालिकाका नगरप्रमुख लव श्रेष्ठले १४ औँ नगर सभामा बताए ।
हाल सम्म नगरपालिकाबाट स्वीकृत भएका ठुला साना गरी ३ सय ५१ वटा योजना मध्ये १ सय १२ वटा योजना सम्झौता भएको मध्ये ४१ वटा योजनाको काम सम्पन्न भइसकेको र यस वर्षका २ सय ३९ वटा योजना सम्झौता हुन बाँकी रहेको उनले बताए ।
यो अवधिमा आन्तरिक राजश्व तर्फ ४ करोड ४३ लाख आम्दानी हुने अपेक्षा राखिएकोमा लक्ष भन्दा कम १ करोड ३२ लाख ९५ हजार रुपैयाँ राजश्व संकलन भएको पनि उनले जानकारी दिए । ढुङ्गा, गिट्टी, बालुवाको ठेक्का लाग्न नसकेको कारण नगरपालिकामा लक्ष्य अनुसारको राजश्व संकलन हुन नसकेकोले बजेटका कारण पनि नगरले लक्ष्य अनुसारको काम समेत गर्न नसकेको श्रेष्ठले बताए ।
नगरले समुदायमा आधारित लघु उद्यमी सिर्जना र विकासका लागि रोजगार कार्यक्रम सञ्चालन गर्नुका साथै त्यस्ता उद्यमीलाई तालिम र प्रविधि हस्तान्तरणको कार्यक्रमलाई पनि सँगै लगेको छ । मन्थलीको सानिमदौमा निर्माण भएको चिस्यान केन्द्रको बाँकी काम अधुरो रहेको र उक्त कार्यलाई पूर्णता दिनका लागि पनि नगर सँग बजेट अपुग भएकोले सोको पूर्ण कार्य सम्पादनको लागि बागमती प्रदेश सरकारलाई अनुरोध गरिएको समेत श्रेष्ठले बताए ।
मन्थली नगरपालिकाको बजेट खर्च २२ प्रतिशत मात्र
