वृहत् रामेछाप महोत्सव आज देखि सुरु

रामेछाप । वृहत् रामेछाप महोत्सव पौष २६ गते (आज) देखि सुरु हुँदै छ । “रामेछापको दिगो विकास र अर्थतन्त्रको आधार, कृषि जलस्रोत र पर्यटन तथा उद्योगको पूर्वाधार, हाम्रो रामेछाप राम्रो रामेछाप“ भन्ने मूल नाराका साथ सुरु हुने महोत्सवको उद्घाटनका लागी बागमती प्रदेशका मुख्यमन्त्री सालिकराम जम्कट्टेल आउँदै छन् ।
मुख्यमन्त्री सालिकराम जम्कट्टेलले दिउसो ११ बजे वृहत् रामेछाप महोत्सव – २०८० को उद्घाटन गर्ने कार्यक्रम रहेको आयोजक संस्था रामेछाप उद्योग वाणिज्य संघका अध्यक्ष नवीन थापा मगरले बताए ।
महोत्सवको तयारीका लागी स्टेज सजिसजाउ पारिसकिएको समेत मगरले बताए । मगरका अनुसार – महोत्सव जिल्ला समन्वय समितिको प्राङ्गणमा हुने छ । महोत्सवमा १५० वटा स्टलहरू रहने र सबै स्टलहरू बुकिङ भैसकेको छ । वृहत् रामेछाप महोत्सव पौष २६ गतेदेखि माघ ७ गते सम्म ११ दिन सम्म संचालन हुनेछ ।
महोत्सवको आयोजकले मन्थली प्रवेश गर्ने विभिन्न स्थानमा गेट निर्माण गर्नका साथै बजार क्षेत्रमा तोरण टाँगेको छ । संघले बजार क्षेत्रको ठाउँ ठाउँमा ब्यानर समेत राखेको छ ।
महोत्सवमा ५० लाख दर्शक भित्र्याउने लक्ष्य रहेको संघका महासचिव कुमार श्रेष्ठले बताए । श्रेष्ठका अनुसार महोत्सवमा जिल्ला भित्रका र बाहिरका ५० लाख दर्शक भित्र्याउने संघको योजना छ । महोत्सवका कारण सुस्ताएको बजार चलायमान हुने समेत अपेक्षा आयोजकले राखेको छ ।