प्रचार प्रसार नहुँदा ओझेलमा रामेछाप जिल्ला अस्पताल

रामेछाप । जिल्लाको रामेछाप नगरपालिकामा रहेको जिल्ला अस्पतालको सेवा सुविधाबारे प्रचारप्रसार नहुँदा नागरिकहरू यस अस्पतालको सेवा सुविधाबाट वञ्चित भएको अस्पतालका अध्यक्ष यम पाख्रिनले बताएका छन् । अध्यक्ष पाख्रिनले भने– हामी जिल्लामा रहेका अरू नगर अस्पताल, पालिका अस्पतालले रेफर गर्ने सरि उपचार सेवा दिन सक्छौँ । तर जिल्ला अस्पताललाई नागरिकले पुरानो सानो स्वास्थ्य चौकी सम्झनाले बिरामीहरू उपचारका लागि काठमाडौँ सम्म धाउनु परेको छ । जिल्ला अस्पताल रामेछापले बुधवार गरेको अन्तर्क्रिरया तथा सामाजिक परीक्षणमा अध्यक्षले यो अस्पतालको प्रचार प्रसारमा विशेष ध्यान दिन समेत अनुरोध गरे ।
पत्रकारहरूले रामेछाप जिल्ला अस्पतालको सेवा प्रवाह लिन किन आउने बिरामीहरू भन्ने प्रश्न गर्दा अस्पतालका नि.मेडिकल सुपरिटेन्डेन्ट डा.केशव श्रेष्ठले अस्पतालको विविध सेवाबारे बताएका थिए । उनले भने – अस्पतालको विशेषज्ञ सहितको सेवा प्रवाह, तालिम प्राप्त जनशक्तिद्वारा सेवा प्रवाह, आधुनिककरण सहितको सेवा, सरकारको प्रत्यक्ष स्वामित्व भएकोले नागरिकहरूलाई सर्वसुलभ रूपमा सेवा प्रवाह हुने भएकोले जिल्ला अस्पतालमा सेवा लिन आउनु होला ।
जिल्ला अस्पतालमा विभिन्न कार्यक्रमद्वारा निःशुल्क सेवाहरू समेत संचालनमा रहेको डा. श्रेष्ठले बताए । उनका अनुसार मुख्यमन्त्री जनता कार्यक्रम, सामाजिक सुरक्षा इकाई, प्रसूति तथा प्रसूतिजन्य शल्यक्रिया, नवजात शिशुलाई उपचार, बिशेषज्ञद्वारा मानसिक, नाक कान र घाँटी सम्बन्धी जाँच, एकद्वार संकट व्यवस्थापन लगायतका निःशुल्क सेवाहरू समेत अस्पतालबाट प्रवाह हुने गरेको छ । श्रेष्ठले भने, भर्ना भएका बिरामीहरूलाई निःशुल्क सन्तुलित खाना तथा खाजाको व्यवस्था, भर्ना भएको बिरामीहरूलाई शैया निःशुल्क, गर्भवती महिला र कुरुवालाई मातृ गृहमा निःशुल्क बस्ने र खाने व्यवस्था, प्रविधियुक्त मेसिनद्वारा जाँच, ल्याब सम्बन्धी विशेष जाँचहरू (थाईरोईड जाँच, भिटामिन, कल्चर, आदि), सदाबहार शान्त वातावरण समेत अस्पतालमा उपलब्ध छन् । साथै अस्पतालको संरचना समेत व्यवस्थित रहेको उनले बताए ।
अस्पताल रामेछाप नगरपालिका वडा नं. ८ मा रहेकोले रामेछाप नगरको दायित्व धेरै हुने भएको हुँदा अस्पतालका लागी एमडिजिपि डाक्टर सेवामा सहयोग, आँखा सेवा संचालनको लागी नगरपालिकाले सहयोग गरेको रामेछाप नगरपालिका वडा नं. ८ का वडा अध्यक्ष सन्तोष तामाङले बताए । उनले भने – हामीले नगरपालिकाको स्वास्थ्य शाखामा रहेका कर्मचारीहरूलाई अस्पतालको सेवा संचालनका लागी पठाएका छौँ । जिल्लाका ८ वटै पालिकाहरू मिलेर यस जिल्ला अस्पतालमा बिरामीहरूलाई सेवा लिने वातावरण मिलाउन अनुरोध छ । सामान्य सेवाका लागी जिल्ला बाहिर जाने गरेको पाइन्छ । उहाँहरूले बाहिर गएर खर्च समेत धेरै मात्रामा गर्नु भएको छ । यस अस्पतालमा विभिन्न सेवाहरू निःशुल्क उपलब्ध भएको हुँदा जिल्ला बासीहरूलाई सेवा लिन समेत अनुरोध छ ।