रामेछाप । सरकारले २०७३ वैशाखदेखि २०७५ असोजभित्र जन्मिएका बालबालिकालाई पोलियो रोग विरुद्धको आईपिभी खोप लगाउँदै छ । रामेछापका ५ हजार ५ सय बढी बालबालिकालाई पोलियो विरुद्धको आईपिभी खोप लगाइँदै छ । खोप अभियान यही जेठ १३ गतेदेखि २६ गतेसम्म सञ्चालन हुँदैछ ।
जनस्वास्थ्य कार्यालय रामेछापका जिल्ला खोप कार्यक्रमका फोकल पर्सन दीपेन्द्र श्रेष्ठका अनुसार जिल्लामा रहेका दुई नगरपालिका र ६ वटा गाउँपालिकाका ५ हजार ५ सय १५ जना बालबालिकालाई पोलियो विरुद्धको आईपिभी खोप लगाइनेछ ।
मन्थली नगरपालिकामा १ हजार ६ सय २०, रामेछाप नगरपालिकामा ६ सय ९१, उमाकुण्ड गाउँपालिकामा ५ सय ६६ र गोकुलगंगा गाउँपालिकामा ६ सय ५५, लिखुतामाकोशी गाउँपालिकामा ४ सय ७७, खाँडादेवी गाउँपालिकामा ५ सय ११, दोरम्बा शैलुङ गाउँपालिकामा ५ सय ४ र सुनापति गाउँपालिकामा ४ सय ९१ जना बालबालिकालाई खोप लगाइनेछ ।
पालिकाहरूमा नियमित खोप सञ्चालन कार्यक्रमलाई प्रभाव नपर्ने गरी विभिन्न तीन चरणमा पोलियो विरुद्धको आईपिभी खोप अभियान सञ्चालन गरिने श्रेष्ठले बताए । श्रेष्ठका अनुसार खोप सञ्चालनका लागि तय भएका २ सय ४ वटा खोप केन्द्रमा २ सय ४ जना स्वास्थ्यकर्मी र ३ सय भन्दा बढी स्वास्थ्य स्वयंसेवक खटिने छन् ।
५५ सय बढी बालबालिकालाई पोलियो विरुद्धको खोप लगाइँदै
