रामेछाप । मङ्गलवार बिहान खाँडादेवी गाउँपालिकाका निर्वाचित जनप्रतिनिधिहरूले जिल्लाको सदरमुकाममा रहेको पूर्वाधार विकास कार्यालयमा ताला लगाइदिए । पालिकाकी उपाध्यक्ष रमा घिसिङको नेतृत्वमा आएका ५ जना वडा अध्यक्षहरू सहितको टोलीले पूर्वाधारको कामकाज ठप्प बनाए ।
पालिका भित्रका आयोजना अलपत्र पारेको भन्दै पूर्वाधार विकास कार्यालय रामेछापमा उनीहरूले ताला लगाएका थिए । उनीहरूले आयोजना कार्यालय विरुद्ध नारा बाजी गर्दै कार्यालयमा ताला लगाएका थिए ।
मन्थली–गोगनपानी–गाल्वा सडक र गोगनपानी–धुलेबेशी– भोटनागी सडक कालोपत्रेको काम पटक– पटक म्याद थप गरे पनि सम्पन्न नभएको कुरा सत्य हो । २०७८ असार १० गते १८ महिनामा सम्पन्न गर्ने गरी मन्थली–गाल्वा सडक र २०७८ असार ३० गते १८ महिनामै सम्पन्न गर्ने गरी सित्खा–धुलेबेसी–भोटनागी सडक सम्झौता भएको थियो । हाल सम्म मन्थली–गाल्वा ३५ प्रतिशत र धुलेबेसी–भोटनागी ५५ प्रतिशत मात्रै काम भएको छ । यसमा सरासर निर्माण व्यवसायीको लापरबाही हो । कामको जिम्मा लिने अनि काम अधुरो बनाएर छाड्ने यस्ता निर्माण व्यवसायीलाई हदै सम्मको कारबाही गर्ने नीति सरकारले ल्याउनु पर्छ । यो नभए सम्म नागरिकको आँखामा छारो हालेर निर्माण व्यवसायी दादागिरी देखाउँदै हिँड्ने छन् ।
काम समयमै सकाउने जिम्मा पूर्वाधार विकास कार्यालयको हो, यसमा दुईमत छैन । आफ्नो पालिका क्षेत्र भित्रको विकास निर्माणमा चासो देखाउनु जनप्रतिनिधिको कर्तव्य हो । तर सरकारको नुनपानी खाएर, सरकारी खर्चमा सदरमुकाम आएर, सरकारी कार्यालयमा तालाबन्दी गर्नु कति उचित हुन्छ त्यो समयले बताउला । नागरिकले त्यसको मूल्याङ्कन गर्लान् नै ।
यता दिनभर पूर्वाधार विकास कार्यालय तालाबन्दी हुँदा आफ्नो काम लिएर आउने सेवाग्राही भने बाहिरै रमिता हेरेर बस्न बाध्य भए । दिन भर कार्यालय बन्द रहँदा समेत नजिकै रहेको जिल्ला प्रशासन कार्यालय मौन बसेको सेवाग्राहीको आरोप छ ।
तालाबन्दी खुलाउन प्रशासनले पहल गरेन भन्ने आरोप छ नि भन्ने सवालमा सहायक प्रमुख जिल्ला अधिकारी किसान न्यौपाने भन्छन् –ताला लगाउन बित्तिकै प्रहरी लिएर ताला फुटाउनु जानु समस्याको समाधान होइन । हामीले सम्बन्धित पक्षसँग कुराकानी गरेर ताला खुलाएकै हो । बुधवार १० बजे सम्म कन्ट्याक्टर आउने र पुनः वार्ता हुने कुरा भएको छ ।
सहायक प्रमुख जिल्ला अधिकारी न्यौपानेले ताला लगाउनु आफैमा कानुन विपरीत कार्य भएकोले यस्तो काम नगर्न आग्रह समेत गरे ।
