रामेछाप । समाजको उन्नति, प्रगति र समग्र विकासको लागी जनप्रतिनिधिले काम गरेर मात्रै नहुने लिखु तामाकोशी गाउँपालिकाका अध्यक्ष केशव महतले बताए । नागरिकको प्रत्यक्ष वा अप्रत्यक्ष सहयोग विना गाउँपालिकाको समृद्धि हुन नसक्ने अध्यक्ष महतले थपे ।
७ वटा वडा रहेको लिखु तामाकोशी गाउँपालिकाको वडा नं. ६ मा जनतासँग जनप्रतिनिधि कार्यक्रम लिएर वडावासी सामु पुगेका अध्यक्ष महतले वडाका नागरिकले समृद्ध गाउँपालिका निर्माणमा सहयोग पु¥याउन अनुरोध गरे । उनले भने – नराम्रो काम गरेको भए नराम्रो भन्दिनुस्, राम्रो गरेको भए राम्रो भन्दिनुस् । पालिकावासीले गरेको टिका टिप्पणी र सुझावले नै समृद्धिको बाटो पछ्याउन सकिन्छ ।
महतले यातायातको गुरु योजना बनाएर सडक विस्तार गर्ने पनि बताए । उनले भने – महत्वको आधारमा सडक कालोपत्रे गर्नलाई पालिकाले योजना बनाउने छ । वडा देखि गाउँपालिका सम्म आइपुग्ने सडकलाई स्तरोन्नति तथा कालोपत्रे गर्न पालिकाले विशेष योजना बनाएको छ ।
जनतासँग जनप्रतिनिधि कार्यक्रममा मोहन सुनुवारले पालिकालाई आफ्नै एप्स बनाउन सुझाव दिए । उनले भने – अहिले जमाना डिजिटलाईजेशनमा गई सक्यो। त्यसैले पालिकाले आफ्नै एप्स मार्फत वा अनलाइन मिडिया मार्फत पालिकाले जारी गरेको सूचना बारे जानकारी गराउने वातावरण मिलाउन प¥यो । आफ्नै एप्स मार्फत पालिकाले के के सेवा सुविधा दिन्छ त्यो जानकारी गराए नागरिकलाई जानकारी पाउन सहज हुने थियो ।
कार्यक्रममा लिखूतामाकोशी गाउँपालिकाकी निवर्तमान उपाध्यक्ष दीपशिखा दहलाले पालिकाका किसानका लागी बालि बिमा तथा पशु बिमाबारे पालिकाले योजना बनाउन सुझाए । सँगै पालिकाकाका अगुवा किसानलाई कृषि तथा पशु प्राविधिक तालिम दिन र आगामी नीति तथा कार्यक्रममा दीर्घकालीन योजनालाई मात्र स्थान दिन दहलाले सुझाव दिइन् ।
रातो किताबमा आएका योजनाहरूकै बजेट सङ्घीय सरकारले कटौती गरेका कारण आफूले जनतालाई ढाटेको आक्षेप लागेको लिखु तामाकोशी गाउँपालिका वडा नं. ६ का अध्यक्ष शिव प्रसाद न्यौपानेले बताए । उनले गाउँपालिकाकी निवर्तमान उपाध्यक्ष दाहालको सुझावलाई केन्द्रित गर्दै भने– सानातिना योजना माग्नुहुन्छ, मागेको योजना नदिए पख्लास् भन्नहुन्छ । अनि कसरी रोक्न सक्नु टुक्रे योजना ?
समृद्ध पालिका बनाउन नागरिकको साथ अनिवार्य
