रामेछाप । अविरल वर्षाका कारणले क्षति पु¥याएका घर परिवारलाई राहत सामाग्री र आर्थिक सहयोग गर्ने सुनापति गाउँपालिकाले निर्णय गरेको छ । सोमबार बसेको गाउँ कार्यपालिका बैठकले वर्षाको कारण घर भत्किएर बसोबास गर्न नमिलेका, पशु चौपाया, खेतबारीसहित अन्नबालीको क्षति बेहोरेका पीडितहरूलाई नगद र जस्तापाता सहयोग गर्ने निर्णय गरेको गाउँपालिकाका अध्यक्ष ठूलोकान्छा तामाङले जानकारी दिए । उनले भने – बाढी पहिरोको कारण पीडामा भएकाहरूको वडाबाट पहिचान गरी सुनापति विपद् व्यवस्थापन कोष मार्फत राहत प्रदान गर्ने निर्णय गरिएको छ । अस्थायी आवास निर्माणको लागि राष्ट्रिय विपद् जोखिम न्यूनीकरण तथा व्यवस्थापन प्राधिकरणमा रिपोर्ट पेस गर्ने र तत्कालै गाउँपालिकाबाट घर पूर्ण क्षति भएर बसोबास गर्न विकल्प नै नभएको परिवारलाई ३ बन्डल जस्तापाता दिने निर्णय गरिएको समेत उनले बताए ।
बसोबासको लागि वैकल्पिक व्यवस्था भएका प्रभावितलाई २ बन्डल जस्तापाता दिने र पहिरोमा पुरिएर मरेको भैँसी (प्रति वटा) नगद २० हजार, गोरु र गाई (प्रति वटा) नगद रु १२ हजार, बाख्रा (प्रति वटा) नगद रु ८ हजार, बाख्राको पाठा पाठी (प्रति वटा) नगद रु २ हजार दिने निर्णय भएको अध्यक्ष तामाङले बताए ।
बाढी पहिरो प्रभावितलाई जस्तापाता र आर्थिक सहयोग
